Thawhlawm kha kan bupi i biaknaklei le minung hawi cung zawnruahnak langhternak caah kan hman. Khrih Jesuh zultu an si khawh nakhnga mi pawl bawmh ding timi a biapi bikmi rian cheubang pakhat in mah rian kha kan ṭuan.—Matthai 28:19, 20.

Mi pakhatkhat a rum nakhnga caah thawhlawm kha kan hmang bal lo. Khrihfa upa asiloah bu rianṭuantu hna kha lahkhah kan pe hna lo. Innkhat hnu innkhat ah phung a chimmi Jehovah Tehte Hna cu lahkhah pek an si lo. Uktu Bu i telin zung ṭengnge le vawleicung pumpi zungpi ah rian a ṭuanmi hna zong lahkhah pek an si lo.

• Cauk Chuahnak: Kum fatinte Baibal le a dang Khrihfa cauk hna kha nuai tampi in holh kan leh, cauk in kan chuah, kan kuat hna i man loin mi kha kan pekṭhenh hna. jw.org website le JW Library app ah taarmi digital cauk pawl zong man loin le thanhlaar hmang loin kan pekṭhenh hna.

• Innsaknak le Remhnak: Vawleicung pumpi ah a ummi Khrihfabu hna nih hmunkhat ah an i pumh khawh nakhnga le Pathian an biak khawh nakhnga aa tlakmi hmun ah biakinn hna kha kan sak i kan remh. Zung ṭengnge le holh lehnak zung hna zong kha kan sak i kan remh. Mah rian tam deuh cu mah lungtho tein aa pemi hna nih an ṭuan caah a dihmi tangka zong a tlawm deuh.

• Khuakhannak: Vawleicung pumpi zungpi, zung ṭengnge, holh lehnak zung le khualtlawng rianṭuantu hna i an rianṭuannak kha vawleicung pumpi rianṭuannak caah an pekmi thawhlawm in kan bawmh hna.

• Phungchimnak: Jehovah Tehte Hna nih thawngṭha chimnak le midang “Pathian bia” cawnpiaknak ah tangka an la hna lo. (2 Korin 2:17) Asinain kumzabu pakhatnak i Khrihfa hna bantukin phungchim rianṭuannak ah an caan tampi a pe i phungchim rianṭuantu si awkah cawnpiak a simi hna cu aa tlakmi inn le a herhmi thilri hna kha pek an si.—Filipi 4:16, 17; 1 Timote 5:17, 18.

• Cawnpiaknak: Peng civui le pengkomh civui caah a dihmi tangka kha thawhlawm chungin hman a si. Mah lengah Baibal hrambunhmi audio le video hna zong kan chuah. Cun an rian kha ṭha tein an ṭuan khawh nakhnga Khrihfa upa pawl le caantling rianṭuantu pawl caah cawnpiaknak tinṭan zong kan tuahpiak hna.

• Leiser Ral A Tongmi Hna Bawmhnak: Leiser ral le minung ruangah a chuakmi harnak a tongmi hna kha tirawl le umnak inn kan pek hna. Mah bantukin minung hawi cung i langhtermi zawnruahnak nih “zumhnak lei i kan rualchan a simi” hna lawng si loin Jehovah Tehte a si lomi hna zong ṭhatnak a hmuhter hna.—Galati 6:10.