Jehovah Tehte Hna Cu Pumpak Phungchim Rianṭuannak Caah Zeitindah Cawnpiak An Si?

AWNG

Jehovah Tehte Hna cu Khrihfa nunning ca a herhmi thil vialte caah cawnpiaknak an hmu peng. Mah ah zapi sin pumpak phungchim rianṭuannak zong aa tel. Mah rian cu Pathian Pennak kong thawngṭha chim ding le cawnpiak ding in Jesuh nih a zultu pawl a fialmi hna rian a si. (Matthai 24:14; 28:19, 20) Zarh fatin tuahmi pumhnak, pengkomh civui le peng civui hna ah mah bantuk cawnpiaknak kha an hmuh. Khrihfabu asiloah bupi ah rian a ngeimi Jehovah Tehte Hna cu a hleikhun in tuahmi Baibal tinṭan hna ah cawnpiaknak an hmu.

Hi capar ah

Jehovah Tehte Hna nih zei bantuk cawnpiaknak dah an hmuh?

Khrihfabu pumhnak. Biakinn tiah auhmi kan i pumhnak hmun ah zarh fatin pumhnak pahnih kan ngei. Pakhat cu zarhlai ah kan tuah i a dang pakhat cu zarhdongh ah kan tuah. Ahopoah i pumh khawh a si i thawhlawm kholh zong a um lo.

Zarhlai pumhnak. Ca relnak, biaruahnak, zapi lak biachimnak, phungchimnak le cawnpiaknak ah ṭhancho khawh ning kong lamhruainak kan hmuh. Phungchimnak, i ruahṭi ding, hmuhsaknak le video hna hmang in cawnpiak kan si. Baibal kong thawngṭha midang sin kan chim tik le hngalh duhnak a ngeimi hna he Baibal kan cawn tikah mah cawnpiaknak nih hmual ngei deuhmi si awkah a kan bawmh. Aa pummi dihlak nih mah cawnpiaknak in ṭhathnemhnak an hmuh. A bik in kan i pumhnak nih Pathian kan zumhnak, amah kan dawtnak le unau pawl kan dawt hnanak kha a fehter chin.
Zarhdongh pumhnak. Mah pumhnak ah ṭhen hnih a um. Ṭhen khatnak cu zapi caah a hleiin timhmi Baibal phungchimnak a si. Ṭhen hnihnak cu Vennak Innsang a cawn awk capar chung i capar pakhat kha biahalnak le phitnak phun in i ruahṭinak a si. Baibal kong le phunglam hna capar in i ruahṭinak le fianternak nih phungchimnak le nifa kan nunnak caah a kan ṭhathnemh.

Peng civui le pengkomh civui. Kum fatin pumhnak ngan voithum kan tuah i pumhnak pakhat ah Khrihfabu tampi i thawngthanhtu pawl an i pum. Mah a nuam tukmi caan hna ah Baibal cung ah hrambunhmi a bik in lakmi biatlangpi pakhat a um i mah ah phungchimnak, hmuhsaknak, biahalnak le video hna aa tel. Khrihfabu pumhnak bantuk in peng civui le pengkomh civui hna nih Baibal kong tam deuh hngalh awk, thawngṭha chim thiam awk le cawnpiak thiam awkah a kan bawmh. Khrihfabu pumhnak bantuk in ahopoah i pumh khawh a si i thawhlawm kholh zong a um lo.

Jehovah Tehte Hna caah Baibal tinṭan hna

Ṭhathnemhnak tam deuh hmuh awkah Jehovah Tehte cheukhat cu Baibal tinṭan a phunphun kai ding in sawm an si. Mah cu zei tinṭan dah an si? Aa tinhmi cu zeidah a si i zei can dah a rauh? Ahodah a kai kho?

Hmaikal Tinṭan

Tinhmi: Caantling rian a ṭuanmi hmaikal b pawl phungchimnak le cawnpiaknak ah an thiam deuh nakhnga cawnpiak kha a si. Mah tinṭan ah i ruahṭinak, hmuhsaknak, phungchimnak le tuahchunhnak hna aa tel.
A Caan: Niruk.
A Kai Khomi: Hmaikal an ṭuannak kum khat a si cangmi hna kha tinṭan kai ding in sawm an si. Cun hmaikal an ṭuannak kum saupi a si cangmi le a luancia kum nga chung ah a kai rih lomi hna zong sawm an si men lai.

Pennak Kong Chimtu Hna Caah Tinṭan

Tinhmi: Caantling rian a ṭuanmi hmuhtonnak a ngei cangmi pawl a hlei in cawnpiak kha a si. Siangngakchia pawl phungchimnak le cawnpiaknak ah an ṭhancho chin nakhnga Baibal kong kha thuk deuh in cawnpiak an si. Sianginn a dihmi tampi cu phungchim awk a herh deuhnak hmun ah rianṭuan ding in sawm an si.
A Caan: Thla hnih.
A Kai Khomi: Sining a tlinhmi le a herhnak hmun paoh ah a kal khomi hmaikal pawl nih form phih khawh a si.

Khrihfa Upa Caah Tinṭan

Tinhmi: Khrihfa upa c pawl kha cawnpiaknak, tuukhalnak, Pathian le zumtukhat unau pawl an dawt hnanak karhter awk ti bantuk Khrihfabu i an rian ṭuan khawh awkah bawmh kha a si.—1 Peter 5:2, 3.
A Caan: Ninga.
A Kai Khomi: Khrihfa upa a si kami le a luancia kum nga chung ah a kai rih lomi hmuhtonnak a ngeimi Khrihfa upa pawl zong sawm an si.

Peng Zohkhenhtu le An Nupile Caah Tinṭan

Tinhmi: Peng zohkhenhtu d tiah auhmi khualtlawng rianṭuantu pawl an rian hmual ngei tein an ṭuan khawh nakhnga cawnpiak ding kha a si. (1 Timote 5:17) Baibal kong thuk deuh in an hngalh nakhnga peng zohkhenhtu le an nupile kha mah cawnpiaknak nih a bawmh hna.
A Caan: Thla khat.
A Kai Khomi: Peng zohkhenhtu a si kami le an nupile kha rian an ṭuannak kumkhat a tlin hnuah sawm an si. Voikhat an kai hnu in kum nga a tlin tikah sawm ṭhan an si.

Pennak Rianṭuannak Tinṭan

Tinhmi: Khrihfa upa le bu rianṭuantu e hna kha atu lio thil sining, thlennak le a herhmi hna he aa tlak in Khrihfabu rian an ṭuan khawh nakhnga bawmh kha a si. (2 Timote 3:1) Mah tinṭan cu kum tlawmpal dan in tuah a si.
A Caan: Voikhat le voikhat aa lo lo, nikhat a si tawn.
A Kai Khomi: Peng zohkhenhtu, Khrihfa upa le bu rianṭuantu kha sawm an si.

Bethel A Lutmi Hna Caah Tinṭan

Tinhmi: Bethel f chungkhar pawl an rian hlawhtling tein an ṭuan khawh nakhnga, Pathian an dawtnak le pakhat le pakhat an i dawtnak a feh chin nakhnga cawnpiak kha a si.
A Caan: Ninga le cheu.
A Kai Khomi: Bethel chungkhar a si kami pawl kha sawm an si. Bethel chungkhar an sinak a sau cangmi a luancia kum nga chung ah a kai rih lomi hna kha sawm an si men lai.

Vennak Innsang Baibal Gilead Tinṭan

Tinhmi: Siangngakchia hna nih Baibal thukpi in an sunsak nakhnga le an cawnmi ning in an nun nakhnga bawmh kha a si. (1 Thesalon 2:13) Gilead tinṭan a kai i zumhfekmi Khrihfa nutling patling a simi unau hna cu Jehovah bupi le vawleicung pumpi Baibal cawnpiaknak rian caah a ṭha deuhmi bawmtu an hung si. Tinṭan a dih cangmi hna cu an ram ah siseh, ramdang ah siseh lohmun asiloah zung ṭengnge ah ṭuan ding in rian pek an si men lai.
A Caan: Thla nga.
A Kai Khomi: Thim a simi caantling rian a ṭuanmi pawl kha zung ṭengnge nih an sawm hna. Mah tinṭan cu United States i Watchtower Educational Center, Patterson, New York ah tuah a si.

Zung Ṭengnge Kawmiṭi Ah Aa Telmi le An Nupile Caah Tinṭan

Tinhmi: Zung Ṭengnge Kawmiṭi g chungtel hna kha rian an ṭuannak zung ṭengnge zohkhenh awk le zung ṭengnge in rian an pek hnanak ram i a ummi Jehovah Tehte Hna i thlaraulei an rianṭuannak zohkhenh awk caah cawnpiak kha a si.
A Caan: Thla hnih.
A Kai Khomi: Jehovah Tehte Hna i Vawleicung Pumpi Zungpi nih Zung Ṭengnge Kawmiṭi ah aa telmi le an nupile kha an thim hna i Watchtower Educational Center, Patterson, New York ah tuahmi tinṭan kai ding in an sawm hna.

Jehovah Tehte Hna nih an hmuhmi cawnpiaknak cu zei cung ah dah hram aa bunh?

Jehovah Tehte Hna nih an hmuhmi cawnpiaknak caah Baibal cu a biapi bikmi a si peng. Baibal cu Pathian thawchuah hnawhmi a si i Khrihfa nunnak caah a ṭha bikmi lamhruainak aa tel tiah kan zumh.—2 Timote 3:16, 17.

Jehovah Tehte Hna nih cawnpiaknak an hmuhmi caah tangka pek a hau maw?

A hau lo. Cawnpiaknak cu man loin a si. Jehovah Tehte Hna i rianṭuannak cu mah lungtho tein pekmi thawhlawm in bawmhmi a si.—2 Korin 9:7.

a Baibal le Baibal hlathlainak caah bawmtu a simi video hna kha kan website jw.org ah hmuh khawh a si.

b Hmaikal timi cu zohchunhawk ṭha a si i tipil a ing cangmi Jehovah Tehte pakhat kha a chim duhmi a si. Anih cu midang sin Baibal kong chim awkah thla fatin suimilam zeizat ka pek lai tiah hmuitinh a ngeimi a si.

c Khrihfa upa timi cu Baibal in mi a cawnpiaktu le Jehovah mi pawl bawmh awk le thapek awkah tuukhal rian a ṭuanmi Khrihfa patling pawl kha a chim duhmi a si. An ṭuanmi rian caah tangka pek an si lo.

d Peng zohkhenhtu cu caantling in rian a ṭuanmi a si i zarh fatin a peng chung i Khrihfabu dangdang kha a tlawng hna. Baibal hrambunhmi phungchimnak le phungchimnak ah an kalṭinak thawng in thlaraulei a unau pawl kha thazaang a pek hna.

e Bu rianṭuantu hna nih unau pawl caah rian a phunphun an ṭuan. Cucaah Khrihfa upa pawl nih cawnpiaknak le tuukhal lennak caah a caan tam deuh an pek khawh.

f Bethel timi cu Jehovah Tehte Hna i zung ṭengnge caah pekmi min a si. Cuka ah caantling in rian a ṭuanmi hna nih an umnak zung ṭengnge lohmun i Jehovah Tehte Hna rianṭuannak kha an bawmh hna.

g Zung Ṭengnge Kawmiṭi ah thlaraulei sining a tlinhmi pa pathum asiloah mah nak tam deuh an i tel.

Cawnpiaknak an hmuhmi in Jehovah Tehte Hna nih zei bantuk ṭhathnemhnak dah an hmuh?

“Kei cu a ningzah a pangmi ka si caah mising sinah Baibal kong chim kha kaa harh. Asinain zarhlai pumhnak i ka hmuhmi cawnpiaknak thawng in zumhnak ka ngei deuh i cawnpiaknak ah ka ṭhangcho deuh. Khrihfabu le ka rianṭuannak zong ah midang he biaruah ka hung thiam deuh.”—Natasha, United States.
“Pennak Kong Chimtu Hna Caah Tinṭan nih dawtnak, lungsaunak le zaangfahnak ti bantuk Pathian sining hna kha ngeih awkah a ka bawmh. Mah nih a ṭha deuhmi Khrihfa, hawikom le innpa a ka siter tiah ka ruah. Mah tinṭan nih zeitindah Baibal kong hlathlainak tuah ding a si timi le mi lungthin a sumi lam in zeitindah Baibal fianter ding a si timi kha a ka cawnpiak.”—Stephen, Nigeria.
“Khrihfa Upa Caah Tinṭan nih Khrihfa upa pakhat in rianṭuan tikah ngeih a herhmi toidornak kha ngeih ding in a ka bawmh. Phungchimnak nih Jesuh nunning i zohchunh a herhnak kong kha a hleiin a ka hngalhter.”—Luca, Italy.
“Pennak Rianṭuannak Tinṭan nih midang he kan i pehtlaih tikah naih a fawimi si, zaangfahnak ngeih le lungtho tein um a biapitnak kong kha a ka cawnpiak. Midang ca thil ka tuah tikah ka tuah dingmi rian a si ca men ah si loin dawtnak ruang ah ka tuah ding a si ti kha ka hun hngalh.”—Samuel, United Kingdom
“Gilead tinṭan nih Baibal thlalang in kanmah le kanmah i dothlat awkah a kan bawmh. (Jeim 1:22-25) Kan ziaza le Jehovah rianṭuannak ah thlennak tuah a herhmi hna kha kan hun hngalh. Mah leng ah kanmah nakin midang kha biapi deuh ah ruah awk le kan biachim le kan tuahsernak vialte ah dawtnak he tuah ding a si ti kha kan cawn.”—Elnathan le Princess, Philippines.