An kham lo. Jehovah Tehte Hna nih raikham sii chunh kha kan thlauh lo. Raikham sii chunhnak cu Khrihfa pakhat cio nih mah tein tuah dingmi biakhiahnak in kan hmuh. Jehovah Tehte tampi nih raikham sii i chunh dingin bia an khiah.

 A ṭhami siithlopnak kha kan cohlan i zawtnak ngan hna a tlawm deuh nakhnga a bawmmi siilei fimthiamnak a ṭhanchomi kha kan sunsak tuk. Ngandamnak zohkhenhtu hna rian an i zuamnak vialte cungah kan i lawm tuk. A hleiin pul rai hna a tlun caan ah a si.

 Jehovah Tehte Hna cu mipi ngandamnaklei rianṭuantu hna he rian kan ṭuanṭi. Tahchunhnak ah, COVID-19 pul rai a chuah tikah Jehovah Tehte Hna nih mah website ah holh phun a za lengin ralrin peknak tampi kan taar, cun mahle hmunhma nih himnak caah lamhruainak an chuahmi kha zulh awkah tha kan pek hna. Mah ah pakhat le pakhat hlatpi in umnak, a bu bu in um lonak, a dang tein umnak, kut ṭawlnak, hmaihuh i huhnak hna lengah nawlngeitu hna nih fialmi asiloah ruahnak cheuhmi ti bantuk a dang tuahsernak hna aa tel.—Rom 13:1, 2.

 Kumhrabu tampi chungah Jehovah Tehte Hna chuahmi cauk nih a tanglei i phunglam hna hi a hleiin a langhter:

•   Ngandamnak zohkhenhnak he aa tlaimi biakhiahnak hna cu mah tein tuah dingmi an si.—Galati 6:5.

   “[Mah mekazin] cu sii asiloah siithlop ning phunkhatkhat kha a dang nakin a ṭha deuh tiah tha a pemi a si lo i siilei ruahnak cheuhnak a pemi zong a si lo. Aa tinhnak cu a dikmi a konglam hna langhter awk le careltu kha anmah tein biakhiahnak tuahter awk kha a si.”—I Hlau!, February 8, 1987.

   “Nangmah asiloah na fale nih raikham sii nan i chun lai maw, chun lai lo timi biahalnak cu pumpak pakhat cio nih mah tein tuah dingmi biakhiahnak a si.”—I Hlau!, August 22, 1965.

•   Nunnak kha kan sunsak tuk caah siithlopnak kha kan cohlan.—Lamkaltu 17:28.

   “Jehovah Tehte Hna nih ngandamnaklei buaibainak hna kan ton tikah a kan bawm khomi siilei fimthiamnak a phunphun kha kan hman. Nunnak kha kan sunsak caah a tlarimi a si i Baibal phunglam he aa ralkah lomi, kan tuah khawhmi vialte kha tuah kan duh.”—Vennak Innsang, July 1, 1975.

   “Jehovah Tehte Hna nih sii le siithlopnak kha lunglawm tein kan cohlan. Ngandam tein le nunkhua saupi in nun kan duh. A tak ti ahcun kumzabu pakhatnak i Khrihfa a simi Luka bantukin Jehovah Tehte cheukhat zong siibawi an si ve. . . . Jehovah Tehte Hna nih siilei rianṭuantu hna i an i zuamnak le an i pumpeknak kha kan sunsak tuk. Kan zawt tikah kan dam khawh nakhnga a kan bawmh ca zongah kan i lawm tuk.”—Vennak Innsang, February 1, 2011.