Jehovah Tehte Hna nih kan zumhnak ah nawlngeitu in Baibal lawng kha kan hman, cucaah Baibal hngalhthiamnak a hun fian deuh tikah kan zumhnak kha kan thlen. a

Mah bantuk thlennak hna cu Phungthlukbia 4:​18 ah a chimmi Baibal phunglam he aa tlak. Hitin a ti: “Miding mi hna lam cu zingka ceunak, chun laicer tiangin a ceu chin lengmangmi bantuk a si.” Ni cu duhsah tein a chuah bantukin a caan a cut tikah Pathian nih Baibal biatak kan hngalhthiam ning kha duhsah in a ṭhanchoter. (1 Peter 1:​10-​12) Baibal nih a chimchung bantukin “donghnak caan” ah kan hngalhthiam ning kha Pathian nih a ṭhanchoter chin.​—Daniel 12:4.

Kan hngalhthiam ning aa thlen ruangah kan khuaruah a har awk a si lo i dawnkhantu zong in kan hmuh awk a si lo. Hlanlio Pathian a biami hna zong nih an ruahnak a palh tikah an hmuhnak kha an rak thlen.

• Pathian nih rian a pek hlan kum 40 lio in Moses nih amahle amah kha Israel miphun hruaitu pakhat in aa rak i hmu.​—Lamkaltu 7:​23-​25, 30, 35.

• Messiah thihnak le thawhṭhannak kong he aa tlaimi chimchungbia kha lamkaltu pawl nih an rak hngalthiam lo.​—Isaiah 53:​8-​12; Matthai 16:21-​23.

• “Bawipa Ni” he aa tlaiin a hmasa Khrihfa hna cu a palhmi ruahnak an rak ngei. ​—2 Thesalon 2:​1, 2.

Pathian nih an hngalhthiam ning a rak remhpiak hna bantukin a kan remhpiak ve lai ti kha kan zumh.​—Jeim 1:5.