A si lo. Innkhat-hnu-innkhat ah phung kan chim nain mah thawng in khamhnak kan hmu lai tiah kan ruat lo. (Efesa 2:8) Zeicah?

Mah tahchunhnak hi ruathmanh: Zaangfahnak a ngeimi pa nih mah ni mah caan ah mahka hmun i a rami paoh a man a fakmi laksawng kaan pek hna lai tiah bia aa kam hei ti u sih. Mah pa biakam kha na zumh taktak ahcun a chim bantukin na tuah ko lai. Cun na hawile le na chungkhar pawl zong mah in ṭhatnak an hmuh ve nakhnga na chimh ve ko hna lai. Asinain mah laksawng na hmuh cu a chim ning in na tuah caah a si lo, mah pa nih pek aan duh caah na hmuhmi a si.

Cu bantukin, Pathian nih ka nawl a ngaimi paoh zungzal nunnak kaan pek hna lai tiah bia a kan kamhmi kha Jehovah Tehte Hna nih kan zumh. (Rom 6:23) Midang zong Pathian biakam in ṭhatnak hmu ve hna seh ti kan duh caah kan zumhnak kong kha kan chimh ve hnanak a si. Asinain phung kan chimnak thawng in khamhnak kan hmu lai tiin cun kan ruat lo. (Rom 1:17; 3:28) A tak ti ahcun ahohmanh nih Pathian sinin hi tluk in a ṭhami thluachuah hmuh awk tlak in kan tuah khawhmi zei thil hmanh a um lo. “Thil ṭha kan tuahmi ruangah si hin lo in amah nih a kan zaangfah ca lawnglawng ah kannih cu a kan khamh. ”—Titas 3:5.