Jehovah Tehte Hna nih leiser ral a tongmi kha kan bawmh lengmang hna. “Mi cungah ṭhatnak tuah kha i zuam u si law zumhnak lei i kan rualchan a simi hna cungah khan i zuam khun u sih” timi Galati 6:10 bia ningin Jehovah Tehte a simi he a si lomi he kan bawmh hna. Cu bantuk caan ah harnak a tongmi hna nih an herh tukmi lungthin lei le thlarau lei zong kan bawmh hna.—2 Korin 1:3, 4.

Leiser ral a tlun hnuah cuka hmun i a ummi Khrihfa upa hna nih an Khrihfabu chung mi vialte an him le him lo hngalh awk le zei bawmhnak dah an herh ti hngalh awkah pehtlaihnak tuah an i zuam. Mah hnuah an hngalhmi thil sining le an bawmh hnanak kong kha Jehovah Tehte Hna i zung ṭengnge ah thawng an thanh hna.

Cuka hmun i Khrihfabu nih an bawmh khawh ti lomi hna kha Jehovah Tehte Hna i Uktu Bu nih bawmh awkah an timhtuah. Mah cu mangṭam a tlun lio i a hmasa Khrihfa hna an i bawmh ning he aa lo. (1 Korin 16:1-4) Leiser ral a tlunnak hmun i zung ṭengnge nih Leiser Ral a Tongmi Bawmhnak Kawmiṭi kha a herhmi thil timhtuah awk le lamhruai awkah rian an pek hna. Hmun dang ah a ummi Jehovah Tehte Hna zong nih bawmhnak caah an caan le an thilri kha lungtho tein an pek hna.—Phungthlukbia 17:17.

Jehovah Tehte Hna zung ṭengnge ah an kuatmi thawhlawm kha leiser ral a tongmi hna bawmhnak caah le a dangdang caah hman a si. (Lamkaltu 11:27-30; 2 Korin 8:13-15) Bawmhnak rian cu lungtho tein aa pemi hna nih a man la loin an ṭuanmi a si caah tangka cu a herh taktakmi hna bawmhnak ca lawng ah hman a si. Mah thawhlawm kha ningcang loin hman lo awkah kan i ralring.—2 Korin 8:20.