Jehovah Tehte Hna cu Baibal ah hram aa bunhmi biaknaklei an zumhnak ruangah nainganzi ah khoikalei hmanhah an ṭan lonak a si. Nainganzi party asiloah aiawhtu hna caah me pek dingin mi va lem le me pek tibantuk an tuah lo. Thimmi ah i tel ve, cozah aa thlen nakhnga an tuahmi cawlcanghnak hna ah i tel ve tibantuk zong an tuah lo. Baibal nih a chimmi zumhawktlak a kong hna ruangah a cunglei i thil sining hna ah an i tel lonak a si.

• Kannih cu nainganzi reng a cohlang lomi Jesuh kha kan i zohchunh. (Johan 6:​15) Jesuh nih ‘vawlei ta si lo’ awkah a cawnpiak hna caah a zultu hna nih cun nainganzi ah i tel awk a si lo ti cu a fiang ko.​—Johan 17:14, 16; 18:36; Marka 12:13-​17.

• Pathian Pennak cungah zumhawktlak tein kan um. Mah Pennak kong he aa tlaiin Jesuh nih hitin a ti: “Pathian Pennak kong thawngṭha hi khuazakip ah chim a si lai.” (Matthai 24:14) Pathian Pennak a ra cang lai tiah chim dingin rian pek a simi aiawhtu hna in kannih cu kan umnak ram i tel in ram dihlak i nainganzi kongah khoikalei hmanhah kan ṭang lo.​—2 Korin 5:​20; Efesa 6:​20.

• Nainganzi ah khoikalei hmanhah kan ṭan lo caah nainganzi kong he aa tlaiin zeibantuk zumhnak a ngeimi hna sin paohah Pathian Pennak kong thawngṭha kha zalawng tein kan chimh khawh hna. Vawleicung buaibainak hna tonghtham awkah Pathian Pennak lawng kan i bochan ti kha kan biachim le kan tuahsernak in langhter awkah kan i zuam.​—Salm 56:11.

• Kannih cu nainganzi ruangah lung i khah lonak a um lo caah vawlei pumpi unau rual in lungrual tein kan um kho. (Kolose 3:​14; 1 Piter 2:​17) Nainganzi ah aa telmi biaknak hna cu an buchung mi hna kha lung i khah loin a umter hna.​—1 Korin 1:​10.

Cozah nawlngeitu pawl kha kan upat hna. Nainganzi ah kan i tel lo nain cozah nawlngeitu pawl kha kan upat hna. Mah cu Baibal nawl pekmi he aa tlakmi a si: “Ram uktu bawi kha an nawl va ngai hna u.” (Rom 13:1) Upadi kan zulh, ngunkhuai kan pek i rammi ṭhatnak caah cozah nih an tuahmi kha kan bawmh ve. A cozah doh dingin cawlhcanghnak hna ah i tel canah “siangpahrang hna le nawlngeitu hna caah” thlacampiak hna u timi Baibal lamhruainak tu kha kan zulh. A hleiin zalawng tein biaknak nawl anmah sinin kan hmuh khawh nakhnga thla kan campiak hna.​—1 Timote 2:​1, 2.

Nainganzi kongah midang nih anmah tein biakhiah khawhnak an ngeihmi zong kha kan upat. Tahchunhnak ah, thimnak hna kha hnahnawhnak pek asiloah me a pe hnga dingmi hna kha va khenkham tibantuk kan tuah lo.

Khoikalei hmanhah kan ṭan lonak hi a thar in tuahchommi a si maw? A si lo. Jesuh hnu zultu hna le kum zabu pakhatnak i a dang Khrihfa hna zong nainganzi ah khoikalei hmanhah an rak ṭang lo. Beyond Good Intentions timi cauk ah hitin a ti: “A hmasa Khrihfa hna nih cozah nawlngeitu pawl kha kan upat hna awk a si tiah an cohlan ko nain nainganzi ah i tel ding a si ti in cun an ruat lo.” On the Road to Civilization timi cauk zongah a hmasa Khrihfa hna cu “nainganzi reng hna kha an cohlang lo” tiah a ti.

Nainganzi ah khoikalei hmanhah kan ṭan lomi cu ram himnak caah ṭihnung a si maw? A si lo. Kannih cu dai tein um a duhmi ramchung mi kan si caah nawlngeitu hna nih an ṭih awk a si lo. National Academy of Sciences of Ukraine nih 2001 kum ah a thanhmi kong hi ruathmanh. Nainganzi ah khoikalei hmanhah kan ṭan lonak kong kha hitin a ti: “Tuchan mi cheukhat nih Jehovah Tehte Hna nih nainganzi ah khoikalei hmanhah an ṭan lomi kha an duh lo. Hlanah Nazi le Communist uknak hna nih a bikin sual an rak puh hnanak a ruang cu khoikalei hmanhah an ṭan lo caah a si.” Asinain Soviet cozah i hremnak tang hmanhah Jehovah Tehte Hna cu “upadi hna kha a zungzal in a zulmi ramchung mi an si. Annih cu cozah ta a simi lei le sehzung hna ah dingfel tein mah zawn ruat loin rian an ṭuan. Communist uknak kha an ralchanh lo.” Tuchan zongah Jehovah Tehte Hna i an zumhnak le an tuahsernak hna cu ramchung i “himnak le nawlngeihnak a hmunh peng nakhnga caah ṭihnung a si lo” tiah mah report i a donghnak ah a langhter.