Pathian le innpa dawtnak nih Jehovah Tehte Hna kha “ka ngai huam lo” tiah a timi hna i telin mi vialte sin thawngṭha chim awkah a kan forh. (Matthai 22:37-​39) Cun Pathian kan dawtnak nih “tehte khaangtu” si ding timi a Fapa nawlpeknak kha zulh awkah a kan forh. (Lamkaltu 10:42; 1 Johan 5:3) Hlanlio Pathian profet hna bantukin Pathian Bia kha atu le atu kan thanh. (Jeremiah 25:4) Innpa kan dawt hna caah nunnak a khamh khomi “Vancung Pennak kong thawngṭha” kha ngaih a huam lomi hna i telin mi vialte sinah kan chim.​—Matthai 24:14.

Hlanah ngaih a rak duh lomi inn i kan kal ṭhan tikah ngaih a duhmi kha kan hmuh ṭhan tawn. A tanglei a kong pathum ruangah thil sining aa thleng tawn:

• Mah inn ah a ummi cu an i ṭhial.

• Mah inn ah a ummi chungkhar dang nih thawngṭha ngaih an duh.

• An lungthin aa thleng. Vawlei thil sining asiloah an sining nih “thlarau ah mi chambau kan si” ti kha a hngalhter hna. (Matthai 5:3) Lamkaltu Paul bantukin ralchanhtu a simi hmanh an i thleng kho.​—1 Timote 1:​13.

Asinain thawngṭha cohlan awkah ahohmanh kan hnek hna lo. (1 Peter 3:​15) Pakhat cio nih biaknak he aa tlaiin kanmah tein biakhiahnak kan tuah awk a si ti kha kan hngalh.​—Deuteronomi 30:19, 20.