Science lei fimthiamnak i a hlawhtlinnak kha kan upat, cun thil sining tampi in langhter a simi science lei fimnak in hmuhmi hna zong kha kan cohlan.

“Science fimthiamnak timi cu kokek kong le kokek thil sining hna an um ning hlathlainak kha a si, cun mah hlathlainak in hngalhnak kan hmu kho.” (Collins Cobuild Advanced Learner’s English Dictionary) Baibal cu science lei cauk a si lo nain kokek kong hlathlai awk le science lei fimthiamnak in ṭhatnak hmuh awkah a kan forh. Tahchunhnak cheukhat kha zoh hna hmanh u sih:

• Arfi lei fimthiamnak: “Van khi zoh tuah u! Nan hmuhmi arfi khi aho nih dah a ser hna? Ralkapbu bantukin a hruaitu hna nih khin a ser hna; zeizat an si kha a hngalh i an dihlak in an min in a auh hna!”—Isaiah 40:26.

• Thilnung (Biology) lei fimthiamnak: “Thing kong, Lebanon i a ummi thing in i thawk in vangpang chungin a hung kheumi hissop tiang a chim tawn; cun saram le vate le a lawnmi thilnung hna le nga hna kong zong kha a chim fawn hna.”—1 Siangpahrang 4:33.

• Sii lei fimthiamnak: “A dammi nih siibawi an herh lo, a zawmi lawnglawng nih an herh.”—Luka 5:31.

• Nikhua lei fimthiamnak: “Hawhra khonnak inn kha na lut bal maw? Rial khonnak inn kha na hmu bal maw? . . .  Nichuahlei thli nih vawlei cungah a kalpi dih hna?”—Job 38:22-24.

Kan chuahmi capar hna ah kokek kong le science lei fimthiamnak i a hlawhtlinnak kong hna aa tel. Mah nih science lei fimthiamnak kha upat awkah a kan forh. Jehovah Tehte nulepa hna nih an fale kha kokek kong ṭha tein an hngalhthiam nakhnga fimnak cawn awkah tha an pek hna. Jehovah Tehte cheukhat cu thilnung (biochemistry) kong cawnnak, kanan tuak ning (mathematics) cawnnak le electric, seh le ceunak kong (physics) fimthiamnak he aa tlaimi rian hna an ṭuan.

Hngalh kan duhmi biahalnak vialte i a phi kha science lei fimthiamnak nih a phit khawh dih lai tiah kan zum lo. a Tahchunhnak ah, vawlei sining kong a hlathlaimi (geologists) hna nih vawlei hi zei in dah ser a si ti kha an hlathlai i thilnung kong a hlathlaimi (biologists) hna nih kan pum rian a ṭuan ning kha ṭha tein an hlathlai. Thilnung pawl nunnak caah vawlei hi zeicah aa tlak bikmi hmun a si? Kan chungril hna hi zeicah rual tein le rem tein rian an ṭuan?

Baibal lawng nih mah biahalnak vialte i a phi kha a kan pek khawh tiah kan zumh. (Salm 139:13-​16; Isaiah 45:18) Cucaah fimnak hmuh khawh awkah science lei fimthiamnak le Baibal kong cawn a hau tiah kan zumh.

A caan ah science lei fimthiamnak le Baibal cu aa khat lo tiah mi cheukhat nih an ruah men lai. Baibal biatak cawnpiaknak an hngalhthiam lo caah cutin an ruahnak a si. Tahchunhnak ah, Baibal nih vawlei kha suimilam 24 a ummi niruk chungah ser dih a si tiah a ti lo.​—Genesis 1:1; 2:4

Theory cheukhat cu science lei fimthiamnak he aa tlak lomi an si. Mah lengah a min a thangmi scientist pawl zong nih mah theory hna kha an cohlang lo. Tahchunhnak ah, kokek thil hna cu fimnak a ngeimi nih a sermi an si, amah tein a hung ummi an si lo ti kha thilnung kong a hlathlaimi hna le chemical lei a thiammi hna nih an cohlan bantukin kan cohlan ve.