Jehovah Tehte Hna nih sualpuhnak le nihsawhnak vialte lehrulh lo ding timi Baibal ruahnak cheuhnak kha an zulh. Tahchunhnak ah, Baibal nih hitin a ti: “Miruamkai a chimhringtu nih cun rak nihsawhnak kha a in tawn.” (Phungthlukbia 9:​7, 8; 26:4) Cucaah i siknak a chuahter khomi, a hmaan lomi sualpuhnak hna cungah lungthin pek loin Pathian mithmai ṭha hmuh awk tu ah lungthin kan pek.​—Salm 119:69.

“Dai tein um caan a um, chim caan a um.” (Phungchimtu 3:7) Biatak hngalh a duh taktakmi hna cungah siaherhnak kan ngei ko nain a herh loin bia i alnak kha cu kan hrial. Jesuh le a hmasa Khrihfa hna i cawnpiaknak le an nunning kha kan zulh.

• Jesuh cu Pilat hmaiah a hmaan loin sual an puh ko nain zeihmanh a let hna lo. (Matthai 27:11-​14; 1 Peter 2:​21-​23) Cun misaram le mizuram a si tiah sual an puhmi zong kha Jesuh nih a let hna lo. Mah canah “Pathian fimnak cu a theitlai nih khan a hmaan tiah a langhter ko” timi Baibal phunglam ningin a tuahsernak in a rak lehrulh hna. (Matthai 11:19) Asinain a herh ahcun a hmaan loin sual a puhtu hna kha ralṭha tein a rak lehrulh hna.​—Matthai 15:​1-3; Marka 3:​22-​30.

  Jesuh nih a zultu pawl kha a hmaan lomi sualpuhnak ruangah lungdongh lo dingin a rak cawnpiak hna. Hitin a ti: “Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah, nan caah lunglawmh awk a va si dah.” (Matthai 5:​11, 12) Asinain cu bantuk sualpuhnak nih thawngṭha chim khawhnak caanṭha a chuahter lai ti zongin Jesuh nih a rak ti. Mah a biakam ningin Jesuh nih a tuah lai: “Nan ral ahohmanh nih an in tei hna i an in al khawh hna nakhnga lo, bia le fimnak kha kan pek hna lai.”​—Luka 21:12-​15.

• Lamkaltu Paul nih ralchanhtu hna he a herh loin bia i al lo awkah Khrihfa hna kha ruahnak a cheuh hna. Cu bantuk bia i alnak kha “santlai lomi thil, pakpalawng men” in a langhter.​—Titas 3:9; Rom 16:17, 18.

• Lamkaltu Peter nih a si khawh chungin an zumhnak kilven awkah Khrihfa hna kha tha a rak pek hna. (1 Peter 3:​15) Asinain a caan ah biachim nakin tuahsernak in runven cu a ṭha deuh ti kha a hngalh. Cucaah hitin a rak ṭial: “A duhduh in bia a chimmi mihrut kha, thil ṭha nan tuahmi in, chim awk hngal loin tuah hna u.”​—1 Peter 2:​12-​15.