Jehovah Tehte Hna nih an Zumhnak he aa Tlak nakhnga Baibal kha an Thleng Maw?
An thleng lo. Mah canah kan zumhnak cu Baibal he aa khah lo ahcun kan zumhnak tu kha kan thlen.
1950 ah Vawlei Thar Lehnak Baibal kha kan chuah. Mah hlanpi in Baibal kha ṭha tein kan rak hlathlai. Hmuh khawhmi zeibantuk Baibal lehmi paoh kha kan hman i kan zumhnak kha Baibal ningin a si nakhnga kan i zuam. Jehovah Tehte Hna nih caan saupi chung an rak zumhmi kong hna lakah cheukhat kha hlathlai hna law mah zumhnak hna kha Baibal he aa khah le khah lo nangmah tein biakhiak.
Kan zumhnak: Pathian cu Thumkomh Pathian a si lo. 1882, July thla Zion Vennak Innsang cauk ah hitin aa ṭial: “Jehovah, Jesuh le thiang thlarau kong kha kan zumh. Asinain Baibal cawnpiaknak he aa ralkahmi pathum komh ah Pathian pakhat asiloah Pathian pakhat ah pathum a um tibantuk cawnpiaknak kan cohlan lo kha kan ca reltu hna nih an hngalh.”
Baibal chimmi: “Jehovah kan Pathian cu pakhat lawng a si.” (Deuteronomi 6:4, The Holy Bible, by Robert Young) “Pathian cu pakhat lawnglawng a um i amah cu kan Pa, zeizong vialte Sertu kha a si i kannih hi amah ca i a nung mi kan si; cun Bawipa cu pakhat lawnglawng a um i cucu Jesuh Khrih kha a si i amah thawng cun zeizong vialte kha ser an si i amah thawng cun kannih zong hi kan nung.” (1 Korin 8:6) Jesuh theng nih hitin a ti: “Ka Pa cu Keimah nakin a ngan deuh.”—Johan 14:28, Douay-Rheims Version.
Kan zumhnak: Hellmei ah zungzal hremnak timi cu a um lo. 1882, June thla Zion Vennak Innsang cauk ah King James Version Baibal i Rom 6:23 kha a cherhchanhmi “Sualnak Man cu Thihnak a Si” timi capar ah hitin a langhter: “Mah langhternak cu a fiang tukmi a si ko. Asinain Baibal cu Pathian Bia a si tiah a zummi hna nih mah bia he i ralkah in sualnak man cu hellmei ah zungzal in hrem a si tiah Baibal nih a kan cawnpiak tiah an zumhmi cu khuaruahhar taktak a si.”
Baibal chimmi: “A sualmi thlarau paoh cu a thi ko lai.” (Ezekiel 18:4, 20, King James Version) Pathian bia a ngai lomi hna caah hmanung bik dantatnak cu zungzal hremnak si loin “zungzal rawhralnak” a si.—2 Thesalon 1:9.
Kan zumhnak: Pathian Pennak cu lungthin chungah a ummi menmen si loin a um taktakmi cozah a si. 1881, December thla Zion Vennak Innsang cauk ah Pathian Pennak kong he aa tlaiin hitin a ti: “Pathian Pennak dirh a sinak a ruang hna lakah vawleicung i a ummi pennak vialte hrawhnak zong aa tel.”
Baibal chimmi: “Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”—Daniel 2:44.
Jehovah Tehte Hna nih an zumhnak kong chim awkah Vawlei Thar Lehnak Baibal lawng maw an hman?
A si lo. Phungchimnak ah Baibal lehmi tampi kha kan hman. Mah canah Vawlei Thar Lehnak Baibal cu man loin Baibal cawnpiaknak ah kan hmanmi a si, a dang Baibal lehmi hman a duhmi hna he zong Baibal kong i ruahṭi kan duh.