Uktu Bu timi cu vawleicung pumpi ah a ummi Jehovah Tehte Hna lam a hruaitu hmuhtonnak a ngeimi Khrihfa phu hmete kha a chim duhmi a si. An ṭuanmi rian phun hnih cu:

•   Jehovah Tehte Hna i cauk, pumhnak le tinṭan hna in Baibal hrambunhmi lamhruainak hna peknak kha an timhtuah i an tlangtlak.—Luka 12:42.

•   Phungchim rianṭuannak lamhruainak, thawhlawm hman ningcang tlangtlaknak ti bantuk Jehovah Tehte Hna i vawleicung pumpi rianṭuannak kha an tlangtlak.

 Kum zabu pakhatnak i Khrihfabu dihlak caah a biapimi biakhiahnak a tuahmi ‘Jerusalem khua i lamkaltu pawl le upa hna’ kha Uktu Bu nih an i zohchunh hna. (Lamkaltu 15:2) Mah hlanlio zumhfekmi pa hna bantukin Uktu Bu cu kan bupi hruaitu an si lo. Khrihfabu Lu in Jesuh Khrih kha Jehovah nih rian a pek ti kha an hngalh i Baibal lamhruainak ningin an zulh.—1 Korin 11:3; Efesa 5:23.

 Uktu Bu chungtel cu Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane le Jeffrey Winder an si. Annih cu U.S.A, New York, Warwick i kan zungpi ah rian an ṭuan.

 Rianṭuannak a phunphun kha tlangtlak awkah Uktu Bu cu kawmiṭi paruk in dirh a si. Chungtel pakhat cio cu kawmiṭi pakhat asiloah pakhatnak tam ah rian an ṭuan.

•   Khuakhangtu Kawmiṭi: Upadi lei kong, leiser ral, zumhnak ruangah hremnak ton tik le Jehovah Tehte Hna harnak a pemi a dang a biapimi thil hna kha ṭuanvo an lak i an tlangtlak.

•   Rianṭuantu Kawmiṭi: Bethel innchungkhar he aa pehtlaimi thil kha an tlangtlak.

•   Cauk Chuahnak Kawmiṭi: Baibal hrambunhmi cauk pawl chuahnak le kuatnak, biakinn, calehnak zung le zung ṭengnge saknak hna kha an tlangtlak.

•   Rianṭuannak Kawmiṭi: “Vancung Pennak kong thawngṭha” chimnak rian kha an tlangtlak.—Matthai 24:14.

•   Cawnpiaknak Kawmiṭi: Pumhnak, tinṭan, aw khumhnak le video program ah chim hngami kong hna kha an timhtuah i an tlangtlak.

•   Caṭialnak Kawmiṭi: Cauk chuahnak le kan website ah taarmi Baibal kong hna kha ṭuanvo an lak i holh lehnak zong an tlangtlak.

 Uktu Bu cu mah kawmiṭi ah rian an ṭuan lengah bupi caah a herhmi kong i ruahṭi awkah zarh fatinte meeting an tuah. Mah meeting ah Baibal cawnpiakmi kha an i ruah i zapi nih an cohlan khawhmi biakhiahnak tuah khawh awkah Pathian thiang thlarau lamhruainak kha an zulh.—Lamkaltu 15:25.

 Annih cu Uktu Bu kawmiṭi a bawmtu zumhawktlakmi Khrihfa an si. (1 Korin 4:2) Rianpek an simi kawmiṭi he aa tlaimi rian ah sining a tlinhmi le hmuhtonnak a ngeimi an si i kawmiṭi in zarh fatin tuahmi meeting ah an i tel ve. Biakhiahnak cu an tuah lo nain man ngeimi ruahnak cheuhnak le hnulei thil sining hna kha an chim i kawmiṭi biakhiahnak ningin an tuah. Cun biakhiahnak an tuahmi kha hmaan tein an check. Vawleicung pumpi ah a ummi unau pawl sin lennak, rian kong meeting le Gilead tinṭan liimnak hna ah phungchim dingin Uktu Bu nih rian an pek khawh hna.