Mi tampi nih vailamtah kha Khrihfa hmelchunhnak a si tiah an ruah. Jehovah Tehte Hna cu Khrihfa kan si ko nain Pathian kan biaknak ah vailamtah kha kan hmang lo. Zei ruangah a si?

A ruang pakhat cu Baibal nih Jesuh cu vailamtah cungah a thi tiah a langhter lo, tung sawhsawh cungah a thi tiah a langhter caah a si. Mah lengah, Baibal nih “siasal kha bia hna hlah u” tiah Khrihfa hna kha fakpi in ralrin a kan pek ca zongah a si, a chimduhmi cu Pathian biaknak ah vailamtah hmang hlah u tinak a si.​—1 Korin 10:14; 1 Johan 5:​21.

Jesuh nih hitin a ti: “Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai.” (Johan 13:34, 35) Cuticun Jesuh nih mah zawn ruat lo dawtnak an ngeihmi nih a zultu taktak an si kha mi a hngalhter hna lai tiah a ti, vailamtah asiloah siasal pakhatkhat nih a langhter lai tiah a ti lo.