American, Pennsylvania mi zapi ṭhatnak ca he aa pehtlaimi upadi nawl peknak in Pennsylvania Vennak Innsang Baibal le Cazual Bu cu a miak a la lomi bu in 1884 ah dirh a si. Jehovah Tehte Hna nih Baibal le Baibal hrambunh in chuahmi cauk hna phawtzamhnak i tel in vawleicung pumpi an rianṭuannak kha bawmh awkah mah bu kha an hman.

Biakamnak ningin bupi i aa tinhnak cu “biaknak, fimcawnnak le bawmh a herhmi hna bawmhnak” caah a si i a hleiin “Jesuh Khrih nih a ukmi Pathian Pennak kong thawngṭha chim le cawnpiak” awkah a si. Bu chungah a lutmi hna cu sawmnak kha anmah lungtho tein an cohlan i bupi chungah an luhmi a si. Zeizat dah thawhlawm an pek timi cungah i hngat in bu chungmi in cohlanmi a si lo. Bu chungah a lutmi hna le hruaitu hna nih Jehovah Tehte Hna i Uktu Bu kha an bawmh hna.

Jehovah Tehte Hna nih Pennsylvania Vennak Innsang Baibal le Cazual Bu min lengah phung ningin hmatpungṭin tuahmi min tampi kha ram tampi ah an hman. Mah ah “Vennak Innsang [Watch Tower or Watchtower]” asiloah mah min pakhatkhat kha leh in hman tibantuk aa tel.

Bupi dirh a si thawk in mah bantuk phung ningin a simi min a phunphun in kan rian hna kha a dih tiang kan ṭuan. Kan ṭuanmi rian hna cu:

• Caṭialnak le chuahnak. Baibal cauk nuai 220, Baibal hrambunh in chuahmi cauk hna kha holhphun 900 lengin le uk nuai thong 40 hrawngin kan chuah cang. jw.org website thawngin mi nih Baibal kha holhphun 160 lengin man pek hau loin an rel khawh lengah “Pathian Pennak cu Zeidah a Si?” tibantuk Baibal biahalnak a phi hna zong kha an hmuh khawh.

• Fimcawnnak. Baibal lamhruainak hna hmuh awkah tinṭan tampi a um. Tahchunhnak ah, 1943 thawk in tuahmi Vennak Innsang Baibal Gilead Sianginn i pehzulh in cawnpiaknak thawngin Jehovah Tehte 9,000 hrawng nih ṭhathnemhnak tampi an hmuh. Mah tinṭan thawngin annih cu missionary in an ṭuan khawh lengah vawleicung pumpi kan rianṭuannak ṭha tein tlam a tlin khawh nakhnga an bawmh. Cun Jehovah Tehte a si lomi hna i tel in mi nuai tampi nih zarh fatinte tuahmi kan pumhnak hna in lamhruainak kha an hmuh. Cathiam dingin cawnnak tinṭan hna a um lengah ca rel le ṭial thiam awkah a bawmmi cauk zong holhphun 120 in chuah a si.

• Bawmh a herhmi hna bawmhnak. 1994 kum, Rwanda ram i miphun ningin thahnak bantuk minung ruangah a cangmi a si ah, 2010 kum Haiti ram i aa hninmi lihninh bantuk leiser ral ruangah a cangmi a si ah harnak a tongmi hna kha a herh ningin kan bawmh hna.

Phung ningin dirhmi bu, phung ningin a simi min hna ruangah kan rian tampi cu liim a si. Asinain kan rian liim a simi cu mah hna cung lawngah aa hngatmi a si lo. Khrihfa pakhat cio nih Pathian pennak kong thawngṭha nan chim lai i nan cawnpiak hna lai timi Pathian pekmi tinvo sung kha ṭha tein kan ṭuan. (Matthai 24:14; 28:19, 20) Kan rianṭuannak kha Pathian nih a kan bawmh, kan rianṭuannak ah hlawhtlinnak kan hmuh i ‘a ṭhancho’ khawh nakhnga Pathian nih a kan bawmh peng lai ti kha kan zumh.—1 Korin 3:6, 7.