Zeicah Jehovah Tehte Hna nih Christmas An Tuah Lo?

AWNG

A hmaan lomi ruahnak

Mi chimmi: Jehovah Tehte Hna nih Christmas an tuah lomi cu Jesuh an zumh lo caah a si.

Biatak: Kannih cu Khrihfa kan si i Jesuh Khrih thawng lawng in khamhnak hmuh khawh a si tiah kan zumh.—Lam. 4:12.

Mi chimmi: Nan bu chung mi hna kha Christmas tuah hlah u tiah nan cawnpiak hnanak thawng in chungkhar ṭhencheunak nan chuahter.

Biatak: Chungkhar kha biapi tuk ah kan chiah i chungkhar a feh nakhnga Baibal hmang in kan bawmh hna.

Mi chimmi: Christmas lungput a simi siannak, daihnak le ṭhatnak tuah ti bantuk lungput kha nan ngei kho ti lo.

Biatak: Siannak langhter awk le daihnak umter awkah nifate kan i zuam. (Phungthlukbia 11:25; Rom 12:18) Tahchunhnak ah, kan i pumh tik le phung kan chim tikah, “man pek loin nan hmuh i man pek loin va pe ve hna u” timi Jesuh lamhruainak kha kan zulh. (Matthai 10:8) Mah lengah, vawleicung ah daihnak a umter hngami, Pathian Pennak ah kan lungthin kan chiah.—Matt. 10:7.

Jehovah Tehte Hna nih zeicah Christmas an tuah lo?

Jesuh nih a chuahnak si loin a thihnak tu kha philhlonak tuah awkah a kan cah tak.—Luka 22:19, 20.
Jesuh zultu hna le a hmasa Khrihfa hna nih Christmas an tuah lo. The New Catholic Encyclopedia nih “Jesuh chuahnak puai kha AD 243 hnu in an rak thawk” tiah a ti, mah cu hmanung bik lamkaltu pawl an thih hnu kum 100 leng a rauh hnuah a si.
Jesuh cu December 25 ah a chuak ti a langhtermi zei thil hmanh a um lo; Baibal ah a chuah ni aa ṭial lo.
Christmas cu a hmaan lomi zumhnak le phunglam in aa thawkmi a si caah Pathian nih a duh lai lo tiah kan zumh.—2 Korin 6:17.

Christmas tuah lo ruangah mi zohchukmi si kha zeicah nan zei a poi lo?

Mi tampi nih Christmas puai cu a hmaan lomi zumhnak in a rami a si ti le Baibal ah a um lomi a si ti kha an hngalh ko nain an tuah ṭhiamṭhiam. Annih nih hitin an ti men lai: Jehovah Tehte Hna nih Christmas an tuah lo ruangah mi zohchukmi si kha zeicah an zei a poi hnga lo?

Baibal nih kan ngeihmi “khuaruah khawhnak” kha hmang in kanmah tein tuaktan awkah a kan forh. (Rom 12:1, 2, NW) Cun biatak sunsak awk zong a kan cawnpiak. (Johan 4:23, 24) Mi nih zeitindah an kan hmuh lai ti kha biapi ah kan chiah ko nain, Baibal phunglam zulh ruang i mi zohchukmi si kha kan zei a poi lo.

Kannih cu Christmas tuah lo awkah kan i thim, midang zong anmah duhmi thimnak nawl an ngei ve ti kha kan hngalh. Cucaah mi nih Christmas an tuahmi kha hna kan hnawh hna lo.