Jehovah Tehte Hna nih cozah pawl le an miphun hmelchunhnak kha an upat hna. Midang nih ram caah biakamnak tuah awk, alan hmai kun awk asiloah ram hla sak awkah thimnak an tuahmi kha kan ralchanh lo.

 Asinain Jehovah Tehte Hna nih mah cu Baibal cawnpiaknak he aa ralchanh tiah kan zumh caah cu bantuk puai hna ah i tel lo dingin kan i thim. Midang biakhiahnak kha kan upat bantukin midang nih kan zumhnak kha upat ve hna seh ti kan duh.

Hi capar ah

•  Zei Baibal cawnpiaknak ruangah dah ramkhel lei puai ah kan i tel lo?

•  Upadi nih i tel hrimhrim dingin a kan hal ah tah zeitin?

•  Jehovah Tehte Hna cu zatlang nun asiloah ramkhel lei pakhatkhat lei ah an ṭang maw?

 A tanglei ah langhtermi a biapimi Baibal phunglam pahnih cu kan i thimmi cungah huham a ngei:

•   Pathian lawng nih kan biaknak hi hmuh awkah aa tlak. Baibal nih “Bawipa na Pathian cu na biak lai i amah rian lawng kha na ṭuan lai” tiah a ti. (Luka 4:8) Ram caah biakamnak le ram hla hna ah mi pakhat nih zei dang thil vialte nakin kan ram kha ka dawt deuh lai timi biakamnak hna aa tel. Cucaah Jehovah Tehte Hna nih cu bantuk puai hna ah lungthiang tein i tel cu a si kho lo.

   Jehovah Tehte Hna nih alan hmaiah kun kha Baibal nih a thlauhmi biaknak tuahsernak asiloah siasal biak bantukin kan ruah. (1 Korin 10:14) Tuanbia lei mifim cheukhat nih miphun alan cu biaknak hmelchunhnak a si tiah an ti. Tuanbia lei mifim Carlton J. H. Hayes nih “ramkhel lei cu biaknak pakhat he aa lo. A biapi bikmi hmelchunhnak cu milem le alan hi an si” tiah a ti. a A hmasa Khrihfa hna kong he aa tlaiin caṭialtu Daniel P. Mannix nih hitin a ti: “Khrihfa pawl nih [Rom] uktu siangpahrang a runvengtu pathian sinah raithawi kha . . . an duh lo. Tuchan i alan hmaiah kun an duh lo bantuk kha a si.” b

  Jehovah Tehte Hna nih alan hmaiah kan kun lo bantukin alan kha kan hrawk lo, kan khang lo asiloah alan le zei bantuk ram hmelchunhnak poah kha zei rel loin kan um lo.

•   Pathian hmaiah cun kan dihlak in kan i khat dih. (Lamkaltu 10:34, 35) Pathian nih “minung pakhat chungin miphun vialte kha a ser hna” tiah Baibal nih a ti. (Lamkaltu 17:26) Mah ruangah Jehovah Tehte Hna nih miphun pakhat, ram pakhatkhat kha a dang nakin a ṭha deuh tiah ruah cu a hmaan lo tiah kan zumh. Khoika in a rami asiloah khoika i a ummi an si hmanhah mi kip cungah upatnak kan langhter.—1 Peter 2:17.

 Jehovah Tehte Hna nih cozah pawl kha kan ralchanh hna lo. Cozah nawlngeitu pawl cu Pathian nih nawl a awnhmi “Pathian nih si seh tiah a timi” hna an si ti kha kan zumh. (Rom 13:1-7) Cun Khrihfa nih cun vawlei nawlngeitu pawl kha kan upat hna awk a si ti zong kan zumh.—Luka 20:25.

 Asinain vawlei upadi nih Pathian nih tuah hlah u a timi thil kha tuah dingin a kan fial ah tah zeitin? Thil sining cheukhat ahcun cozah pawl kha phung ningin upadi remh awkah hal khawh an si men lai. c Hal khawh an si lo ahcun Jehovah Tehte Hna nih “minung nakin Pathian nawl ngaih deuh” awkah upatnak tein an i thim.—Lamkaltu 5:29.

 An ṭang lo. Jehovah Tehte Hna cu zatlang nun buaibainak asiloah ramkhel lei ah khoika lei hmanhah an ṭang lo. Ram caah biakamnak kan tuah lomi, alan hmai kan kun lomi asiloah ram hla kan sak lomi cu ramkhel lei cawlcanghnak ah kan i tel caah a si lo. Mah canah cu bantuk puai kong he aa tlaiin Baibal ah hram aa bunhmi kan zumhnak ruangah a si.