A tanglei a kong hna ruangah Jehovah Tehte Hna cu raltuknak ah kan i tel lo:

1. Pathian nawl kan ngaih. Pathian salle nih “an vainam cu tuhmui ah an ser hna lai” i “raldoh zong an i tim ti lai lo” tiah Baibal nih a ti.—Isaiah 2:4.

2. Jesuh nawl kan ngaih. Jesuh nih lamkaltu Piter kha hitin a ti: “Na nam cu a kawng ah sawh ṭhan ko, zeicahtiah hriamnam a lami cu hriamnam in an thi lai.” (Matthai 26:52) Mah bia in Jesuh nih a zultu pawl cu raltuk awkah hriamnam an i tlaih lai lo ti a langhter.

   Jesuh zultu hna nih nainganzi ah khoika lei hmanh an ṭan lonak thawng in ‘vawlei ta nan si lai lo’ timi Jesuh nawl kha an zulh. (Johan 17:16) Ralkap rianṭuannak kha an do lo i ralkap tlak aa timmi hna zong, hna an hnawh hna lo.

3. Mi kha kan dawt hna. Jesuh nih a zultu hna kha “pakhat le pakhat i daw u” tiah a ti hna. (Johan 13:34, 35) Cuticun annih cu vawleicung pumpi unau rual in dirh an si caah an unau hna he zeitikhmanh ah ral an i tu lai lo.—1 Johan 3:10-12.

4. A hmasa Khrihfa hna nawl kan i cawn. Encyclopedia of Religion and War timi cauk nih hitin a ti: “Jesuh i a hmasa zultu hna nih raltuknak le raltuknak he aa pehtlaimi rian cu dawtnak he aa tlaimi Jesuh phunglam le nan ral kha nan dawt hna lai timi nawlbia he aa ralkah” ti kha an hngalh caah “an hrial.” Cu bantukin Baibal kong a hlathlaitu German mi Peter Meinhold zong nih Jesuh i a hmasa zultu hna kong kha hitin a chim: “Khrihfa a simi caah ralkap ṭuan cu aa tlak hrimhrim lomi a si tiah an rak ruah.”

Jehovah Tehte Hna cu mipi caah man a ngeimi an si i an umnak ram himnak kha hna an hnawh lo. Mah Baibal nawlpekmi ningin uktu pawl kha kan upat hna:

• “Ram uktu bawi kha an nawl va ngai hna u.”—Rom 13:1.

• “Siangpahrang cu siangpahrang ta a simi thil kha va pe u law Pathian cu Pathian ta a simi thil kha va pe ko u.”—Matthai 22:21.

Cucaah upadi kha kan zulh, ngunkhuai kan pek i mipi ṭhatnak caah cozah nih a tuahmi kha kan bawmh.