Mi chimmi: Jehovah Tehte Hna nih thawhṭhan an tuah lomi cu Khrihfa an si lo caah a si.

Biatak: Jesuh Khrih cu a kan Khamhtu a si tiah kan zumh i kan si khawh chung in “a keneh zulh” kan i zuam.—1 Piter 2:21; Luka 2:11.

Mi chimmi: Jesuh cu thihnak in a thoṭhan tiah nan zum lo.

Biatak: Jesuh a thoṭhan ti kha kan zumh, mah cu Khrihfa zumhnak a hrampi a si ti kha kan hngalh i phung kan chim tikah mah kong kha biapi ngaiin kan chim.—1 Korin 15:3, 4, 12-15.

Mi chimmi: Thawhṭhan puai in nan fale nuamhnak an hmuh lomi kha zei ah nan rel lo.

Biatak: Kan fale kha kan dawt hna i anmah cawnpiak awk le an i nuamh nakhnga bawmh awkah kan si khawh chung in kan i zuam.—Titas 2:4.

• Thawhṭhan puai hi Baibal ah hram aa bunhmi a si lo.

• Jesuh nih a thawhṭhannak si loin a thihnak tu kha philhlonak tuah awkah a kan cah tak. Judah mi hna calendar ningin a thih ni ah Philhlonak puai kha kumfate kan tuah.—Luka 22:19, 20.

• Thawhṭhan puai cu hlanlio fahrin khawhnak puai tuahnak in a rami a si caah Pathian cohlan lomi puai a si tiah kan zumh. Pathian nih lungthin dihlak in amah biak awkah a kan hal i a duh lomi phunglam ning in biaknak nih a thin a hunter.—Exodus 20:5; 1 Siangpahrang 18:21.

Thawhṭhan puai cu Baibal ah hram aa bunhmi a si lo caah tuah lo awkah bia kan khiah. Baibal nih minung sermi phunglam kha zulh loin “fimnak ṭha le ruahthiamnak” kha hman awkah a kan forh. (Phungthlukbia 3:21; Matthai 15:3) Mi nih thawhṭhan puai he aa tlai in kan zumhnak kong a kan halmi kha kan chimh hna tik zong ah, an duhmi thimnak nawl an ngeihmi kha kan upat.—1 Piter 3:15.