Jehovah Tehte Hna cu Zionism tiah auhmi Jew uknak dirhnak cawlcanghnak ah kan i tel lo. Khrihfa kan si i kan zumhnak cu Baibal cungah hram aa bunh. Jew mi pawl Palestine ah an i pumhmi cu Baibal chimchungbia he aa pehtlaimi a si tiah biaknak cheukhat nih an cawnpiak hna. Asinain Jehovah Tehte Hna nih cutin kan zum lo. Cun mah ramkhellei ṭhanchonak kong kha Baibal nih a chimchung ti zongin kan zum lo. A tak ti ahcun Baibal nih minung cozah pakhat kha a dang cozah nakin a hlorh bal lo asiloah miphun pakhat kha a dang miphun nakin a hlorh bal lo. Jehovah Tehte Hna nih an chuahmi Vennak Innsang ah “Zionism cu Baibal nih a cohlang lo” tiah fiang tein a langhter.

Encyclopædia Britannica cauk ah Zionism timi cu “Jew miphun cawlcanghnak a si. Aa tinhnak cu Palestine ah Jew pennak dirhnak kha bawmh awkah a si” tiah a ti. Zionism a chuahnak cu biaknaklei le ramkhellei ruangah a si. Jehovah Tehte Hna nih Zionism cu biaknaklei cawnpiaknak in kan cohlang lo. Zionism cawlcanghnak ah kan i tel lo.

Jehovah Tehte Hna cu biaknaklei rian lawng a ṭuanmi bu kan si, Zionism i tel in zei bantuk ramkhellei cawlcanghnak hmanh kha kan ṭanh lo. Jehovah Tehte Hna cu ramkhellei ah khoikalei hmanhah an ṭang lo timi tuanbia tampi a um. Ram cheukhat i Jehovah Tehte Hna cu ramkhellei ah khoikalei hmanh an ṭan lo caah hremnak an tong. Pathian Pennak lawng nih vawleicung ah daihnak a chuahter khawh, minung cozah asiloah zei bantuk cawlcanghnak hna hmanh nih daihnak an chuahter kho lo tiah kan zumh.

Jehovah Tehte Hna i a hrampi kan zumhnak ah khoika hmun asiloah khoika ram i a ummi kan si hmanhah cozah nih a chuahmi upadi kha kan zulh awk a si timi aa tel. Jehovah Tehte Hna nih cozah ralchanhnak asiloah hriamnam i tlaih in i dohnak ti bantuk buaibainak hna ah kan i tel lo.