Canada ram, Alberta peng, Calgary khua ah ka chuak. Bawhte ka si lioin ka nu le ka pa cu an i ṭhen caah ka nu he ka pi le ka pu sinah kan i ṭhial. Ka pi le ka pu nih an kan dawt tuk caah ka ngakchiat lio cu kaa nuam tuk. A nuam tukmi ka ngakchiat lio kong kha atu tiang kaa cinken rih.

 Kum sarih ka si ah ka nu le ka pa cu an i um ṭhan i United States, Missouri peng, St. Louis ah kan i ṭhial. Mah thawk in ka nunnak cu a ṭhatlonak lei ah a hun i thleng. Ka pa cu a puarhrangmi a si ti kha ka hun hngalh. Tahchunhnak ah, sianginn thar ka kai hmasa bik ni i inn ka kir ṭhan tikah sianginn ka kaiṭi hawi pawl nih an ka velhmi le ka lehrulh hna lomi kha a hngalh. Mah tikah ka pa cu a thin a hung tuk i ka hawile nih an ka velhmi nakin fak deuh in a ka velh. Kum sarih lawng ka si rih nain a dang ngakchia pawl he kaa velh lengmang cang.

 Ka pa cu a puarhran tuk caah ka nu nih a celh lo i thinhung ngai in le aw thangpi in an i si. Kum 11 ka si ah ritnak sii ka hmang i zu ka hun ding. Ka thin a tawi chin i lam ah a ummi hna he atu le atu kan i vel tawn. Siangsangruun ka dih tikah cun zaangen a hmang tukmi pakhat ka hung si cang.

 Kum 18 ka si tikah U.S. Tilawng Ralkap ah ka lut. Mah ah mi thah ning kha an kan cawnpiak. Kum nga hnuah Dothlatnak Bu (FBI) ah rian ka ṭuan lai timi tinhnak ka ngeih caah tilawng ralkap in ka chuak i lungthinlei fimnak kha ka hlathlai. United States ah sianghleiruun kai kaa thawk. Cun Canada ah kaa ṭhial ṭhan i mah ah sianghleiruun kha ka peh.

 Sianghleiruun ah a ummi, mi pawl le phu pawl cung ah ka lung a dong. Mi pawl cu anmah zawn lawng an i ruat. Vawleicung ah a ummi thil vialte hi pakpalawng a simi a lo. Minung nih tonmi buaibainak hna zong hi tawnghtham khawh dawh a lo lo. Cucaah vawlei a ṭhat deuh nakhnga mi nih an thlen khawh timi ruahchannak ka ngei kho ti lo.

 Ka nunnak ah hmuitinh ka ngeih ti lo caah zu ka ding, ritnak sii ka hmang, tangka tampi ka kawl i nupa sualnak zong ka tuah. Party pakhat hnu pakhat ka kai, nu zong pakhat hnu pakhat kaa thleng i nupa sualnak zong ka tuah. Ralkap ka si lioah cawnpiakmi ka si caah mah le mah zumhnak zong ka ngei. Cucaah atu le atu mi he kaa vel. Keimah pumpak in a ding tiah ka hmuhmi he aa ralkah tiah ka ruah ahcun kaa tel. Cuticun zaangennak sal pakhat ka hung si.

 Nikhat cu ka hawipa pakhat he vawlei tang khaan ah ritnak sii kan hmang i kangza kha phung ning loin zuar awkah kan i timtuah. Mah lioah ka hawipa nih Pathian na zum maw tiah a ka hal. “Vawlei ah a ummi sifah harnak hna hi Pathian ruang ah a si ahcun Pathian kong hngalh ka duh lo” tiah ka leh. A thaizing, ka rian thar i rian ka ṭuan ni ah Jehovah Tehte a simi ka rianṭuanṭi hawi pakhat nih “Vawlei ah a ummi sifah harnak hna hi Pathian ruang ah a si tiah na ruat maw?” tiah a ka hal. Nizan ah ka chimmi kong kha a ka hal caah ka khuaruah a har tuk i mah kong kha tam deuh in hngalh ka duh. Mah hnu thla ruk chung bia tampi kan i ruah. Nunnak kong he aa tlaimi a har tukmi ka biahalnak hna kha Baibal in a ka hmuhsak.

 Mah lioah kan umṭimi ka ngaknu nih ka cawnmi kong ka chimhmi kha a duh lo. Voikhat cu Zarhpi Ni ah Baibal i ruahṭi ding in Jehovah Tehte Hna kha kan inn ah ka sawm hna tiah ka chimh. A thaizing rian in inn ka ṭin tikah inn ah a ummi thil vialte kha a lak i a ka kaltak cang ti kha ka hmuh. Cucaah inn leng ah ka chuak i ka ṭap. Pathian sinah thla ka cam i bawmhnak ka hal. Mah cu Pathian min Jehovah hmang in a voikhatnak thla ka cammi a si.—Salm 83:18.

 Ni hnih a rauh hnuah Jehovah Tehte nuva tuahkhat he Baibal kan cawng. An ṭin hnuah Vawlei Cung Paradis Ah Zungzal Na Nung Kho timi cauk kha ka rel i mah zan ah ka rel dih. a Jehovah Pathian le a Fapa Jesuh Khrih kong ka theihmi nih ka lung a ka suk tuk. Jehovah cu zaangfah a hmangmi a si i harnak kan ton tikah a ngaih a chia ve ti kha ka hun hngalh. (Isaiah 63:9) A hlei in Pathian nih a ka dawtnak le ka caah a Fapa nih a pekmi raithawinak nih ka lung a ka suk tuk. (1 Johan 4:10) Jehovah nih “pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si” caah ka cung ah Jehovah a lung a saumi a si ti kha ka hun hngalh. (2 Peter 3:9) Jehovah nih a sinah a ka hnuh tiah ka ruah.—Johan 6:44.

 Mah zarh ah Khrihfabu pumhnak ah ka hun i pum. Ka sam a sau, tumbul kaa tonh caah ka muisam cu ṭih a nungmi a lo. Asinain Jehovah Tehte Hna nih an hmuh lonak a saumi an chungkharmi an hmuh ṭhanmi bantuk in an ka pehtlaih. A hmaanmi Khrihfa bantuk in an tuah. Ka pi le ka pu inn ah ka phanh ṭhanmi bantuk in ka ruah. Asinain mah nakin a ṭha deuh.

 Baibal in ka cawnmi kong hna ruang ah ka nunning ka hun i thleng. Ka sam kaa meh i nupa sualnak zong ka tuah ti lo. Ritnak sii le zu zong kaa phiat. (1 Korin 6:9, 10; 11:14) Jehovah mithmai ṭha hmuh ka duh. Ka tuahmi thil kha Pathian nih a duh lo ti ka hngalh ahcun silhnalhnak bia ka chim lo. Mah canah ka lungthin ah fahnak ka tuar. ‘A hnuah mah tin zeitikhmanh ah ka tuah ti lai lo’ tiah keimah le keimah kaa ti. A caan thawn loin ka ruahnak le ka tuahsernak kha thlen awkah kaa zuam. Jehovah lamhruainak ning in ka nun caah a rauhhlan ah ṭhathnemhnak ka hun hmu. Baibal ka cawn in thla ruk hnu, 1989, July 29 ah Jehovah Tehte pakhat in tipil ka ing.

 Baibal nih ka ziaza thlen awkah a ka bawmh. A hlan ahcun zaangen a hmangmi he kan i ton ahcun puarhrangpi in ka lehrulh hna. Asinain atu ahcun “mi vialte he i rem” awkah kaa zuam. (Rom 12:18) Ka thiam tuk ruang ah a si lo. Baibal i thlen khawhnak ṭhawnnak, thiang thlarau le Jehovah bawmhnak thawng in kaa thlen khawhmi a si.—Galati 5:22, 23; Hebru 4:12.

 Atu ahcun ritnak sii, zaangennak le ziaza rawhralhnak sal si canah Jehovah mithmai ṭha hmuh awk le ka si khawh chung in Pathian caah i pek awkah kaa zuam. Pathian an hngalh nakhnga mi pawl kha ka bawmh hna. Tipil ka in hnu kum tlawmpal ah thawngthanhtu a herh deuhnak ram ah kaa ṭhial. Kum tampi chung mi pawl kha Baibal ka cawnpiak hna i an nunnak a ṭhanchomi ka hmuh caah kaa lawm. Ka nu zong ka lungput le ka tuahsernak aa thlenmi kha a hmuh i Jehovah Tehte pakhat a hun si caah kaa lawm tuk.

 1999 ah, atu ah Pennak Kong Chimtu hna caah Tinṭan tiah auhmi tinṭan kha EI Salvador ram ah ka kai. Mah tinṭan nih pennak kong chimnak rian ah hruai awk, Khrihfabu ah cawnpiak awk le tuukhal rian ṭuan awkah a ka timhtuah. A hmaikum ah ka dawtmi ka nupi, Eugenia he kan i um. Cun Guatemala ram ah caantling phungchimtu in rian kan ṭuan.

 Atu ah ka nunnak cu lung a dongmi si canah kaa nuam tuk cang. Baibal cawnpiakmi ning in nunnak nih ziaza ṭhatlonak le zaangennak hna in a ka luatter. Ka nunnak ah dawtnak taktak le daihnak a ka hmuhter.