RALRING TEIN UM U!
Ṭih A Nungmi Ti Lian—Baibal Nih Zeidah A Chim?
Vawleicung pumpi ah mi tampi cu ṭih a nungmi ti lian an tong. Mah report hna hi i zohhmanh:
“China ram i khuapi hna ah Zarhte Ni in Nithum Ni tiang ruah fakpi in a sur caah millimeter 744.8 (lehmah 29.3) tiang ti a lian . . . Cucaah a luancia ni tlawmpal chung i a surmi ruah cu kum 140 chung ah a cei bikmi a si tiah ti a si.”—AP News, 2023, August 2.
“Japan ram thlanglei ah Typhoon Khanun thlichia a hrang i ruah fakpi in a sur a ni hnihnak, Nili Ni tiang ah a tlawm bik ah mi pahnih an thi cang. . . . Thlichia ruang ah tlang a tamnak Taiwan laifang ah ruah a fah cu meter 0.6 (pe 2) tiang a phan kho men tiah an ruah.”—Deutsche Welle, 2023, August 3.
“Canada ram Atlantic ah kum 50 chung ah a cei bikmi ruah ruang ah zarhte le zarhpi chung ah [Nova Scotia ah] ti a lian.”—BBC News, 2023, July 24.
Mah kong he aa tlaiin Baibal nih zeidah a chim?
“Ni hmanung bik” hmelchunhnak
Baibal nih kannih cu “ni hmanung bik” caan ah kan nung tiah a ti. (2 Timote 3:1) Jesuh nih kan chan ah “thil ṭihnung” asiloah ṭih a nungmi hmelchunhnak hna kha nan hmuh lai tiah a chimchung. (Luka 21:11) Khuacaan hmaan lonak ruang ah nikhua cu ruahlopi in atu le atu aa thleng i leiser ral zong a tam chinchin.
Ruahchannak
Baibal nih atu kan vawlei ah a cangmi thil ṭihnung hna nih ruahchanhnak a kan ngeihter ning kong kha a kan chimh. Zeicah? Jesuh nih hitin a ti: “Hi thil hna an hung um kha nan hmuh tikah Pathian Pennak cu a nai cang ti kha nan hngalh lai.”—Luka 21:31; Matthai 24:3.
Atu ah a cangmi thil sining hna nih a rauhhlan ah Pathian Pennak a ra cang lai ti kha a langhter. Ti aa hel ning i tel in vawleicung kokek thil vialte kha a uk dih cang lai.—Job 36:27, 28; Salm 107:29.
Pathian Pennak nih kan pawngkam buaibainak hna zeitindah a tawnghtham lai timi kong tam deuh in hngalh awkah “Vawlei Cu Ahonih Dah A Khamh Lai?” [Myanmar] timi capar ah zoh.