2022 chungah raldohnak, chawlehnaklei buaibainak le leiser ral kong thawngpang atu le atu kan theih. Baibal lawng nih mah thil hna a tlunnak a sullam taktak kha a fianter.

2022 ah a cangmi thil hna i a sullam

 A luanciami kum ah a cangmi thil hna nih “ni hmanung bik” tiah Baibal nih a auhmi caan ah kan nung ti kha a langhter chinchin. (2 Timote 3:1) Mah caan cu 1914 in aa thawk. Nai ah a cangmi thil hna le Baibal nih kan caan kong a chimchungmi pawl aa khah ning kha i cinken:

 Raltuknak.—Matthai 24:6.

•   “2022 Cu Europe Ah Ṭih A Nungmi Raldohnak A Tlun Ṭhan Kum A Si.” a

 “Mangṭam.”—Matthai 24:7.

•   “2022: A Fakmi Eidin Harnak A Chuah Kum.” b

 “Ngal-eu zawtnak.”—Luka 21:11.

•   “Polio zawtnak a hung chuak ṭhan, monkeypox zawtnak cu buaibainak nganpi a hung si i COVID-19 nih harnak nganpi a chuahter peng rih. Mah thil sining nih chawnh khawhmi zawtnak cu zeitluk in dah ṭih a nun ti le minung cu zeitluk in dah a tha a dermi kan si ti kha a langhter.” c

 Ṭih a nungmi hmelchunhnak hna.—Luka 21:11.

•   “Thli lum hrannak, khuakhennak, ram mei kanghnak le tilian hna. 2022 ṭhal cu khuacaan chiatnak tampi a ummi caan in i cinken a si lai ti cu a fiang ko. A ruang cu mah nih rawhralnak tampi, mi thong tampi thihnak le mi nuai tampi inn le lo sunghnak hna a chuahter caah a si.” d

 “Ralthawhnak [asiloah, “i tuai urnak, ralchanhnak”].”—Luka 21:9.

•   “Mi pawl cu chawlehnaklei buaibainak, a hleiin tangka man ngeih lonak a karh ruangah an thin a hung tuk i 2022 cozah hna cungah fakpi in duhlonak an langhter.” e

Hmai kum ah zeidah a cang lai?

 2023 ah zeidah a cang lai ti kha ahohmanh nih fiang tein an chim kho lo. Kan theihmi cu a rauhhlan ah Pathian Pennak asiloah vancung cozah nih vawlei caah thlennak nganpi a tuah cang lai ti kha a si. (Daniel 2:44) Mah cozah nih minung tonmi buaibainak vialte kha a hrawh lai i Pathian duhnak kha vawlei ah a tlinter lai.—Matthai 6:9, 10.

 Jesuh Khrih ruahnak cheuhnak kha zul in vawlei sining nih Baibal chimchungbia a tlinter ning kha ‘hngilh loin hngah’ awkah kan in forh. (Marka 13:37) Atu ah Baibal nih aan bawmh khawh ning, nangmah le na chungkhar kha a ṭha deuhmi hmailei ruahchannak aan pek khawh hna ning kong tam deuh hngalh awkah zaangfahnak in pehtlaihnak rak kan tuah.