Vawleicung pumpi ah a ummi mi pawl nih ni a linh tuk caah a hlan nakin khuacaan linhnak le leiser ral hna kha an tong deuh. A tanglei thawngpang hna hi zoh:

•   “June thla i a kihlum cu kum 174 chung ah vawleicung pumpi ah a linh bik thla a si.”—2023, July 13, National Oceanic and Atmospheric Administration, U.S. Department of Commerce.

•   “Italy, Spain, France, Germany, Poland, Sicily le Sardinia tikulh hna ah a kihlum 48°C [118°F] tiang a phan kho. Mah cu Europe i a kihlum an ṭial balmi lakah a lin bikmi a si kho men.”—2023, July 13, European Space Agency.

•   “Vawlei cu a linh chin caah atu le atu ruah a sur lai, ruah tampi in a sur lai i mah nih tilian zong tampi a chuahter lai tiah kan i ruahchan.”—2023, July 17, Stefan Uhlenbrook, director of hydrology, water and cryosphere at the World Meteorological Organization.

 Mah bantuk khuacaan chiatnak a karh chinmi kong na theihmi nih na lungre aan theihter maw? Mah a biapimi kong he aa tlaiin Baibal nih a chimmi kha zohhmanh.

 A si. Vawleicung pumpi ah thli lum hrannak le khuacaan chiatnak hna cu kan chan ah a cang lai tiah Baibal nih a chimchungmi he aa tlak. Tahchunhnak ah, Jesuh nih “thil ṭihnung” pawl nan hmuh hna lai tiah a rak chimchung. (Luka 21:11) Vawleicung pumpi in a linh chin lengmang caah mi tampi cu minung tuahsernak ruang ah vawlei a rawk lai ti kha an phang.

 A cang lai lo. Pathian nih vawlei kha zungzal kan umnak hmun caah a ser. Cucaah minung nih vawlei an hrawh dingmi kha nawl a awnh hna lai lo. (Salm 115:16; Phungchimtu 1:4) ‘Vawlei a hrawktu kha ka hrawh’ hna lai tiah bia a kan kamh.—Biat. 11:18.

 Pathian nih leiser ral in vawlei kha a khamh khawh i a kilven lai ti kha Baibal nih a langhter.

•   “[Pathian nih] thlichia cu a daihter i tilet cu an dai.” (Salm 107:29) Pathian cu kokek thil sining uk khawhnak ṭhawnnak a ngei. Cun khuacaan chiat tuk ruang ah atu ah minung nih an tonmi harnak a chuahtermi pawngkam buaibainak hna zong a tawnghtham khawh.

•   “Ram cu na dawt caah a cung ah ruah na surter; na rumter i a vawlei na ṭhatter.” (Salm 65:9) Pathian thluachuah thawng in vawlei cu paradis ah a cang lai.

 Pawngkam thil sining a ṭha ṭhan lai timi Baibal biakam kong tam deuh in hngalh awkah “Aho Nih Dah Vawlei A Khamh Lai?” [Myanmar] timi capar kha rel.