Kum 2023 aa thawk tikah kan dihlak in kanmah le kan chungkhar caah a ṭha bikmi kha kan i ruahchan. Zeicah cutin kan i ruahchan khawh?

 Atu ah kan tonmi buaibainak cu chikkhat lawng a si i a rauhhlan ah a dong lai timi thawngṭha kha Baibal nih a kan chimh. A tak ti ahcun Baibal nih “lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.”—Rom 15:4.

•   Baibal biakam kong tam deuh in hngalh awkah “Hmailei Ruahchannak Taktak” timi capar kha rel.

 Baibal ruahchannak cu “kan nunnak caah. . . thir cangai” bantuk a si. (Hebru 6:19) Mah ruahchannak nih lungdaihnak a kan pek. Mah nih atu kan tonmi buaibainak tawnghtham awk, a ṭhami lungput ngeih awk le a hmunmi nuamhnak hmuh awkah a kan bawmh khawh. Tahchunhnak ah:

•   Baibal ruahchannak nih ritnak sii nih a leemmi pa pakhat a bawmh ning kong kha hlathlai. Ka Nunning Ruangah Ka Lung A Dong timi video kha zoh.

•   Baibal ruahchannak nih dawtmi pakhat nih thihtak tikah a kan bawmh khawh ning kong kha hlathlai. A Ngaih A Chiami Hna Caah Hnemhnak timi video kha zoh.

 Mi tampi nih a ṭhami thil a cang lai tiah an i ruahchan, asinain mah an i ruahchannak a tling taktak lai maw ti cu an i fiang lo. Asinain Baibal biakam cu cutin a si lo. Zeicah? Baibal biakam cu “lih a chim kho lomi” Jehovah Pathian a sinin a rami a si caah a si. (Titas 1:2) Jehovah lawng hi a biakamnak vialte tlinter awkah ṭhawnnak a ngeimi a si; “a duhmi paoh” kha a tuah khawh.—Salm 135:5, 6.

 Baibal ruahchannak in ṭhatnak hmuh awkah lunglawm tein kan in sawm. ‘Nifate in Cathiang chung kha na kawlnak’ thawngin na zumhnak kha na fehter khawh. (Lamkaltu 17:11) Man loin cawnpiaktu he Baibal cawnnak program ah naa telnak thawngin nangmah tein hlathlai. Kum 2023 kha a ṭha tukmi ruahchannak he thawk!