Minung nuncan ziaza cu a chia chin lengmang. A puarhrangmi mizaw nih siibawi kha an au hnawh hna; rawldawr i rawl a cawmi hna nih a zuartu cung ah upatnak an ngei lo; vanlawng in khual a tlawngmi hna zong an puarhrang; a sualmi siangngakchia hna nih an saya pawl kha an tlerhkhawn i an doh hna. Mah leng ah ramkellei ah a ṭuanmi cheukhat nih ziaza rawhralnak ah an i tel nain a dang cheukhat nih midang mithmai ṭha hmuh awkah ziaza ṭhatnak langhter ding in an i zuam.

 Baibal cu nuncan ziaza ṭha ngeih khawh awkah zumhawktlak lamhruainak a kan pe khotu a si. Mah leng ah zeicah tuchan ah aa tlak lomi ziaza hna a tam chinchin timi kong zong a kan chimh.

 Vawleicung pumpi ah mi nih an cohlanmi le a ṭha in an hmuhmi ziaza cu a chia chin lengmang ti cu fiang tein hmuh khawh a si.

•   Naiah Gallup timi thawngpang thanhnak nih America rammi hna kha biahalnak an rak tuah hna. Mi tampi nih a luancia kum 22 in atu tiang United States i nuncan ziaza hna cu hlanlio nakin a ṭha lo chinchin tiah an ti.

•   Ram 28 ah a ummi minung 32,000 kha biahalnak an tuah hna i zatuak ah 65 nih tuchan i kan hmuhmi ziaza hna cu a hlan nakin a ṭha lo chinchin tiah an ti.

 Tuchan ah kan hmuhmi nuncan ziazalei kong kha Baibal nih a rak chimchung.

•   ‘Ni hmanung bik kha an phak tikah harnak caan a si lai ti kha philhhlah. Mi cu anmah zawn lawng aa ruatmi, a hak a kaumi, aa porhlawmi le lung a puammi an si lai; an nu le an pa kha an zomhtaih hna lai i an nawl an ngai duh hna lai lo; lawmh a hngal lomi, . . . zaangfahnak a ngei lomi, a puarhrangmi an si lai.’—2 Timote 3:1-3.

 Mah chimchungbia zeitindah a tlin timi kong tam deuh in hngalh awkah “Baibal nih Tuchan Mi hna Ruahnak le Tuahsernak he aa tlaiin a Chimchung maw?” timi capar ah zoh.

 Vawleicung pumpi ah ziazalei cu a rawkral chinchin ko nain mi nuai tampi nih Baibal cu a ṭha bik lamhruainak a kan petu a si ti kha an hmuh. Mah ziazalei ruahnak cheuhnak hna cu “zungzal in an hmun; biatak le dinnak in pek an si.” (Salm 111:8) Tahchunhnak cheukhat kha i ruah hna u sih.

•   Baibal chimmi: “Mi nih kan cung ah tuah hna seh ti nan duhmi ning in midang cung ah va tuah ve u.”—Matthai 7:12.

   A sullam: Mi nih kan pehtlaih hna seh ti kan duh bantuk in midang zong kha zaangfahnak le upatnak he kan pehtlaih ve hna awk a si.

•   Baibal chimmi: “Cucaah lihchim um ti hlah seh. Aho cio paoh nih a unau cu biatak chim seh.”—Efesa 4:25.

   A sullam: Kan biachim le kan tuahsernak kip ah a dingfelmi kan si a hau.

 Mah kong he aa tlaiin tam deuh hngalh awkah zaangfahnak in mah hna hi rel:

•   “A Hmaan le Hmaan Lo Kong Hngalh Awkah—Na Zumh Khawhmi Lamhruainak” timi Vennak Innsang capar.

•   Aa tlaimi capar “Baibal Nih Inkhawhnak Ngeih Awkah A Kan Bawmh Khawh Ning.”