RALRING TEIN UM U!
A Rauhhlan Ah Vawleicung Pumpi Ah Raldohnak A Chuak Lai Maw?—Baibal Nih Zeidah A Chim?
A luancia kum 30 chung ah mi tampi nih ram pakhat le pakhat i pehtlainak cu a ṭha i a ṭhangcho tiah an ruah. Asinain naiah a cangmi thil hna nih mah cu a hmaan lo ti kha a langhter.
“Lebanon ramri ah Israel le Hezbollah raldohnak aa thawk tikah Gaza i raldohnak nih mahka pawngkam i a ummi a dang ram hna zong a hnorsuan lai tiah mi tampi cu an thin a phang.”—Reuters, 2024, January 6.
“Iran nih a ukmi phu nih hmun dangdang ah a ummi hna kha an doh hna i Iran nih nuclear hriamnam zong ruahlopi in a tuah ṭhan. Mah leng ah Iran cu Russia le China he zong an ṭangṭi. Mah nih nitlaklei ram caah tlerhkhonhtu thar a siter.”—The New York Times, 2024, January 7.
“Russia raldohnak ruang ah Ukraine ram ah rawhralnak tampi a um peng rih.”—UN News, 2024, January 11.
“China cu chawlehnak ah an ṭhangcho i ralkaplei nawlngeihnak zong ah an ṭhangcho. Taiwan zong miphun ṭanhnak lungthin an ngei chin. Cun China le U.S. kar i, hrocer buin i pehtlaihnak nih raldohnak fawi tein a chuahter khawh.”—The Japan Times, 2024, January 9.
Tuchan ah kan hmuhmi vawleicung i a cangmi buaibainak kong he aa tlaiin Baibal nih a chimmi a um maw? Mah nih vawlei ralpi a thawhter lai maw?
Baibal Nih Atu Ah A Cangmi Thil Sining Kong A Chimchung
Tuchan ah kan hmuhmi raldohak kong he aa tlaiin Baibal ah cuset khaset tiin cun a chimchung lo. Asinain tuchan ah raldohnak a karh lai i mah nih “vawleicung in daihnak” kha a lak lai timi tu cu a chim chung.—Biathlam 6:4, NWT.
“Caan a dih dengmang tikah” vawleicung nawlngeitu hna cu an i ‘do’ lai asiloah uknak caah fakpi in an i zuam lai tiah Daniel Baibal ah a chimchung. Mah i zuamnak ah ralkap lei ṭhawnnak langhternak le “ro” thil tampi hmannak asiloah tangka tampi hmannak hna aa tel lai.—Daniel 11:40, 42, 43.
A Ra Dingmi Raltuknak
Baibal nih vawlei thil sining cu a chia chin lai tiah a ti. Jesuh nih ‘vawlei hramthawk in atu ni tiang ah a um bal lomi, harnak nganpi a tlun lainak’ kong kha a chimchung. (Matthai 24:21) Mah “harnak nganpi” nih Armageddon tiah auhmi raldohnak a chuahter lai. Mah cu ‘Lian Ngan Bik Pathian ni lianngan ni ah pakhat le pakhat i dohnak’ tiin langhter a si.—Biathlam 16:14, 16.
Asinain Armageddon nih minung pawl kha hrawh canah a khamh hna lai. Pathian nih mah raldohnak kha hmang in raldohnak tampi a chuahtermi minung uknak kha a donghter lai. Armageddon nih a hmunmi daihnak zeitindah a chuahter lai timi kong hngalh awkah mah capar hna hi rel: