Baibal nih Armageddon raldohnak kha vawleicung i hmun fate pakhat lawng ah a cang dingmi raldohnak in si loin minung cozah vialte le Pathian karah a cang dingmi vawleicung pumpi raldohnak in a langhter.

•   “Khuachia thlarau . . . hna cu vawleicung khuazakip ah khan an kal i vawleicung siangpahrang vialte kha an pumh hna. Cu bantuk in hmun khat ah an pumh hna cu, Lian Ngan Bik Pathian ni lianngan ni ah pakhat le pakhat i do hna seh ti caah a si. . . . Thlarau hna nih khan siangpahrang cu hmunkhat ah an pumh hna i cu hmun cu Hebru holh in Armageddon ti a si.”—Biathlam 16:14, 16.

 “Armageddon” timi biafang cu Har Meghid·dohnʹ timi Hebru biafang in a rami a si i “Megiddo Tlang” tiah sullam a ngei. Megiddo cu hlanlio Israel khuapi pakhat a si. Cucaah mi cheukhat nih Armageddon raldohnak cu Israel ram in aa thawk lai tiah an ruah. Asinain Megiddo hmun asiloah Nichuah Laifang ah a ummi zei bantuk hmun hmanh ah “vawleicung siangpahrang vialte” le an ral pawl i dohnak ca tiang in a kau lo.

 Biathlam Baibal cauk cu “hmelchunhnak hna in” ṭialmi phun a si. (Biathlam 1:1, NWT) Cucaah Armegedon timi nih a um taktakmi hmun pakhat kha si loin miphun pawl nih Pathian uknak hmanung bik an ralchanh dingmi vawlei thil sining kha a chim duhmi a si.—Biathlam 19:11-16, 19-21.