“Apocalypse” timi bia na theih tikah na lung ah zeidah a rak chuak? Vawleicung pumpi rawhnak le vawleicung i a ummi thilnung vialte donghnak kha na lung ah a chuak men lai. Mi cheukhat nih a rauhhlan ah cu bantuk leiser ral hna a um lai tiah an zumh, a hleiin a tanglei i thawngpang hna an rel tikah a si:

•   “Nuclear raldohnak a chuak lai. Mah cu timh ciamman tein, lakhruak in le i theihsualnak hna in aa thawk kho men.”—Bulletin of the Atomic Scientists.

•   “A luancia kumhra chungah a fakmi thlichia, ram meikanghnak, khuakhennak, coral lungvar sen hna a raang in i thlennak, a linmi tilet (heat wave) le tilian ti bantuk thil hna a um.”—National Geographic.

•   “Africa ram i khaubawk ruun cu kumhrabu tampi chungah ṭih a nung bikmi an si.”—The Associated Press.

 Vawleicung pumpi in apocalypse a tlun tikah vawlei hi a rawk lai maw? Baibal nih zeidah a chim?

 A dong lai lo. Pathian Bia, Baibal nih vawlei cu zungzal in a hmun lai tiah fiang tein a langhter. (Phungchimtu 1:4) Pathian nih a sermi vawlei kha hrawh canah “vawlei a hrawktu” vialte kha a hrawh hna lai.—Biathlam 11:18.

 Baibal nih “vawlei” a dong cang lai a ti tikah Pathian zei i a rel lomi, mah pumsa duhnak lawng a kawlmi, vawlei mi kha a chim duhmi a si. Noah chan ah a rak tuah bantukin “Pathian zei i a rel lomi” kha kha a donghter dih hna lai.—2 Peter 2:5; 3:7.

 1 Johan 2:17 ah a chim bantukin “vawlei le a chung i a ummi thil minung nih an duhmi hna hi an lo cuahmah cang.” Pathian nih vawlei taktak kha si loin mah pumsa duhnak hnu a zul pengmi pawl a hrawh hna lai ti kha mah Baibal caang nih a langhter.

 Baibal nih zeitik ah dah donghnak a phanh lai ti kha a chim lo. (Matthai 24:36) Asinain donghnak a nai cang ti kha a langhter. Baibal nih hitin a chimchung:

•   Raldohnak, mangṭam, pul rai le a ṭhawngmi lihnin hna “hmun kip” ah a tlung lai.—Matthai 24:3, 7, 14; Luka 21:10, 11; Biathlam 6:1-8.

•   Mi tampi nih mah zawn lawng ruahnak lungput an langhter lai. Tahchunhnak ah, “a hak a kaumi”, “lawmh a hngal lomi” le “ruru-hranghrang in khua a sami” an si lai.—2 Timote 3:1-5.

 Mi tampi nih 1914 thawkin vawlei thil sining cu donghnak caan kong Baibal chimchungbia he aa tlak caah donghnak caan a nai cang ti kha an cohlan. A kong tam deuh in hngalh awkah “Baibal Chanrelnak Ningin 1914 Kong Zeidah Kan Hngalh?” timi le “‘Ni hmanung Bik’ Asiloah ‘Donghnak Caan’ Hmelchunhnak hna cu Zeidah An Si?” timi capar kha rel.

 Baibal chung i “apocalypse” tiah lehmi, a hramthawk Greek biafang cu “phuan” asiloah “langhter” ti sullam a ngei. Mah biafang nih thuhmi kong phuannak kha a langhter tawn. Baibal nih ‘Jesuh Khrih a langhnak’ kong zong a chim. Mah cu Jesuh nih vawleicung i ṭhatlonak vialte a hrawk tik le Pathian a biami pawl laksawng a pek hna tikah a si lai.—2 Thesalon 1:6, 7; 1 Peter 1:7, 13.

 Baibal i a donghnak bik cauk cu A·po·kaʹly·psis asiloah Biathlam tiah auh a si. Mah nih hmailei ah a cang dingmi kong kha a phuan caah a si. (Biathlam 1:1) Mah cauk ah thawngṭha kong le ruahchannak kong aa tel. (Biathlam 1:3) Pathian nih dinlonak vialte kha a hrawh lai i vawlei hi paradis ah a canter ṭhan lai ti zong a langhter. Mah tikah minung nih fahnak, harnak le thihnak hna kan tong ti lai lo.—Biathlam 21:3, 4.

 Mah a ṭha tukmi biakam kong kha tam deuh in hngalh na duh maw? Jehovah Tehte Hna tuahmi, man loin Baibal cawnnak program in kan in sawm. Tuni ah pehtlaihnak rak kan tuah colh.