RALRING TEIN UM U!
Milem Biaknak—Baibal Nih Zeidah A Chim?
Catholic News Service chimmi ningin 2022, March 25, St. Peter Biakinn ah an tuahmi puai pakhat ah Pope Francis cu Mary milem hmaiah “a mit aa chinh, a kun i aw chuah loin thla a cam.” Mah cu daihnak caah “Marry sinah a nawlmi” a si. Vatican Thawngzamhnak ah “Pope nih minung Miphun Dihlak ca, a hleiin Russia le Ukraine kong he aa tlaiin Mary Lungthin Chungah A Luh nakhnga thla a cam” tiah a ti.
Zeitindah na ruah? Milem hmaiah thlacam le biaknak ah milem pawl hman cu aa tlak lai maw? A tanglei Baibal caang hna hi ruathmanh:
“Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa loin siasal zeihmanh nan i ser lai lo. Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi BAWIPA nan Pathian cu ka si i nahchuah a ngeimi Pathian ka si.”—Exodus 20:4, 5. a
“Annih pathian tu cu sui le ngun in sermi an si, minung kut nih a sermi an si. Kaa cu an ngei, sihmanhsehlaw an holh kho lo, mit cu an ngei, sihmanhsehlaw an hmu kho lo. Hna an ngei, asinain khua an thei lo, hnar an ngei, sihmanhsehlaw rim an thei lo. Kut an ngei, sihmanhsehlaw zeihmanh an tawng kho lo, ke an ngei, sihmanhsehlaw an kal kho lo; an hrom nih aw zeihmanh a ser kho lo. Siasal a sertu hna le siasal aa bochanmi hna cu an sermi siasal bantuk cu si ve hna seh!”—Salm 115:4-8.
“Keimah lawnglawng hi BAWIPA na Pathian cu ka si. Ka sunparnak hi pathian dang ahohmanh hrawm ka duh hna lo i ka thangṭhatnak hi siasal zeihmanh hrawm ka duh hna lo.”—Isaiah 42:8.
“Siasal kha bia hna hlah u.”—1 Korin 10:14.
“Pathian deu kha va hrial hna u.”—1 Johan 5:21.
Biaknak ah milem hmannak kong he aa tlaiin Baibal chimmi kong tam deuh in hngalh awkah “Baibal Hmuhnak—Milem” timi capar kha rel. Asiloah Pathian Nih Biaknak Ah Milem Hman Kha A Duh Maw? timi video kha zoh.
Mah kong hna he aa tlaiin Baibal chimmi kong zong kha hngalh na duh ko lai:
“Ngaknu Thiang Mary—Kong He Aa Tlaiin Baibal Nih Zeidah A Chim?”
“Khuaruahhar Thil Hna—A Cang Taktakmi Maw An Si, Phuahchommi Dah?”
Photo credit: Vincenzo Pinto/AFP via Getty Images
a Jehovah timi cu Pathian i pumpak a min a si. (Salm 83:18, NW) “Jehovah Cu Ahodah A Si?” timi capar kha rel.