Zeidah a hmaan, zeidah a hmaan lo ti hngalh cu a har chinchin cang maw? Mi nih a hmaanmi le a cang taktakmi kong nakin an ruahnak le an hmuhnak cung ah i hngat in zumh awkah hnek an si caah a si kho men. Cucaah tuchan ah mi tampi nih vawleicung pumpi ah biatak cu a um ti lo tiah an zumh.

 Mah bantuk hmuhnak cu a thar a si ti lo. A luancia kum 2,000 hrawng ah Rom Uktu Pontius Pilate nih Jesuh kha lunghrinnak he hitin a hal: “Zei cu dah biatak cu a si?” (Johan 18:38) Pilate nih Jesuh nih a lehmi kha a hngak lo nain a biahalnak cu a biapi tukmi a si. Baibal a phi nih vawleicung mi pawl nih lungtuai in an ummi kong he aa tlaiin zeidah a hmaan i zeidah a hmaan lo ti kha hngalh awkah aan bawmh lai.

Biatak cu a um taktak maw?

 A um. Baibal ah “biatak” timi biafang kha a cang taktakmi kong leng ah a hmaanmi le aa tlakmi kong langhternak caah a hman. Mah nih Jehovah a Pathian cu a hmaanmi biatak Hrampi a si tiah a kan cawnpiak i “zumhawk tlakmi [biatak, NWT] Pathian na si” tiah a ti. (Salm 31:5) Baibal ah Pathian sinin a rami biatak kong aa tel i mah biatak kha ceunak he a tahchunh. Cucaah Baibal nih tuchan kan vawlei ah a ummi buaibainak dihlak hna in lam a kan hruai khawh.—Salm 43:3; Johan 17:17.

Zeitindah biatak kan hmuh khawh?

 Pathian nih Baibal biatak kha ruat loin zum hna seh ti a kan duh lo. Mah can ah kan ruahnak cung ah i hngat loin khuaruah khawhnak kha hmang in ṭha tein dothlat awkah a kan sawm. (Rom 12:1) Pathian nih “lungthin dihlak” in amah kha ka hngal hna sehlaw ka daw hna seh ti a duh. Cun Baibal in kan cawnmi biatak in zumh awkah tha a kan pek.—Matthai 22:37, 38; Lamkaltu 17:11.

Lihbia cu khoika in dah a rat?

 Lihbia cu Baibal nih “lih vialte pa” tiah a auhmi Pathian ral a simi Satan Khuachia sinin aa thawk. (Johan 8:44) Hmasa bik minung sinah Pathian kong he aa tlaiin lihbia a chim. (Genesis 3:1-6, 13, 17-19; 5:5) Mah caan thawk in Satan nih lihbia a chim peng i Pathian kong he aa tlaiin biatak kha a thuh.—Biathlam 12:9.

Tuchan ah zeicah lihbia a tam tuk?

 Kan chan cu Baibal nih “ni hmanung bik” tiah a auhmi caan a si cang i Satan nih vawleicung mi pawl kha a hlan nakin a hlen chinchin cang hna. Mi nih midang kha hlen in anmah ṭhatnak caah lihbia chim kha a phung in an hmuh cang. (2 Timote 3:1, 13) Tuchan biaknak tam deuh zong ah lihbia chim cu a phung bantuk a si cang. Kan chan kong he aa tlaiin Baibal nih a chimchung bantuk in mi nih “anmah theih duh mi chimtu ding ah cawnpiaktu” pawl an kawl hna lai i ‘biatak kha kal tak’ awkah an i thim lai.—2 Timote 4:3, 4.

Biatak cu zeicah a biapit?

 Mi nih pakhat le pakhat cung ah zumhnak an ngeih nakhnga biatak an herh. Zumhnak a um lo ahcun i hawikomhnak cu a rawk lai i bu cu caan saupi a dir kho lai lo. Baibal ah Pathian nih biatak cung ah i hngat in kan biakmi kha a duh tiah a ti. Hitin a ti: “Pathian cu thlarau a si i a biatu hna nih cun thlarau le biatak in an biak awk a si.” (Johan 4:24) Baibal biatak nih a hmaan lomi biaknak cawnpiaknak a langhter ning kong hngalh awkah “Pathian Dawt Awkah A Harter Khomi Lihbia Hna” timi aa tlaimi capar kha rel.

Pathian nih zeicah biatak kha hngal hna seh ti a kan duh?

 Pathian nih khamhnak hmu seh ti aan duh. Cucaah khamhnak na hmuh khawh nakhnga a kong he aa tlaimi biatak kha na hngalh a hau. (1 Timote 2:4) Pathian phunglam kong na hngalh i mah ning in na nun ahcun amah he hawikom nan si kho lai. (Salm 15:1, 2) Mi nih biatak kong an hngalh nakhnga bawmh awkah Pathian nih Jesuh kha vawlei ah a thlah. Cuaah Pathian nih Jesuh cawnpiaknak kha ngai hna seh ti a kan duh.—Matthai 17:5; Johan 18:37.

Pathian nih lihbia kha zungzal in a donghter lai maw?

 A donghter lai. Pathian nih anmah ṭhatnak caah mi nih midang an hlenmi hna kha a huat. Lihbia a chim pengmi hna kha vawlei in ka ṭhawl hna lai tiah bia aa kam. (Salm 5:6) Pathian nih cutin a tuah tikah mah a biakam hi a tlinter lai: “Biatak cu zungzal in amah ningte a si ko.”—Phungthlukbia 12:19.