RALRING TEIN UM U!
COVID In Minung Nuai 6 An Thi—Baibal Nih Zeidah A Chim?
2022, May 23 ah Vawleicung Pumpi Ngandamnak Bu (WHO) nih COVID-19 ruangah mi nuai 6.27 an thi tiah a langhter. Asinain 2022, May 5 ah chuahmi thawngpang hna ah langhtermi a thimi cu WHO nih a chimmi nakin an tam deuh. Mah ah 2020 le 2021 chungah “COVID-19 zawtnak taktak asiloah COVID-19 zawtnak tiah ruahmi in a thimi dihlak cu nuai 14.9 hrawng an si tiah a langhter.” Ngaihchiat awk ngai a simi mah kong he aa tlaiin Baibal nih zeital a chim maw?
Thihnak a chuahter khomi pulrai kong Baibal nih a chimchung
Jesuh nih “ni hmanung bik” tiah auhmi caan chungah, ngal-eu zawtnak asiloah “ṭih a nungmi zawtnak” pulrai hna a um lai tiah a chimchung.—Luka 21:11, Contemporary English Version; 2 Timote 3:1.
Jesuh chimchungbia cu tuchan ah a tling cang. Tam deuh in hngalh awkah “‘Ni hmanung Bik’ Asiloah ‘Donghnak Caan’ Hmelchunhnak hna cu Zeidah An Si?” timi capar kha rel.
Baibal nih hnemhnak a kan pek
“Zeizong vialte ah a kan bawmtu Pathian . . . harnak kan innak kip ah a kan bawmh.”—2 Korin 1:3, 4.
Dawtmi nih thihtaknak a tongmi, mi tampi cu Baibal bia in hnemhnak an hmu. “Ngaihchiatnak Tawnghtham Ning—Atu Ah Na Tuah Khawhmi” le “A Ngaih A Chiami Caah A Ṭha Bikmi Bawmhnak” timi capar hna ah tam deuh in hlathlai.
Zungzal in tawnghtham ning kha Baibal nih a phuan
“Na Pennak cu rung tlung ko seh, Vancung khua ah na duhnak an tuah bangin Vawleicung ah hin tuah si ve ko seh.”—Matthai 6:10.
A rauhhlan ah “Pathian Pennak” thawngin “kan ram i a ummi cu ka zaw tiah an zai ti lai lo.” (Marka 1:14, 15; Isaiah 33:24) Vancung pennak kong le mah nih zeidah a tuah lai timi kong kha Pathian Pennak Cu Zeidah A Si? timi video ah zoh.
Nangmah le na chungkhar nih a ṭha tukmi biakamnak hna le fimnak aa telmi ruahnak cheuhnak hna in ṭhatnak nan hmuh nakhnga Baibal kong tam deuh cawn awkah kan in sawm.