Cozah pawl i ziknawh an einak cu vawleicung pumpi ah buaibainak pakhat a si i mah nih ṭhatlonak a chuahter. a Tahchunhnak ah, COVID-19 pulrai chung ah ram tampi nih cozah nawlngeitu pawl cu zawtnak thlopnak caah bawmhnak tangka an kawlnak in an rum tiah an ti. Cu bantuk ziknawh einak ruangah mi tampi cu an herhmi sii din awk an ngeih lo caah fahnak tuar buin an thi.

 Cozah pawl ziknawh einak ruangah thil ṭha lo tampi a chuak. United Kingdom i vuanci a rak simi David Cameron nih hitin a ti: “Ziknawh einak cu maimomh nang bantuk a si i ramkip ti awkah a karh cang” tiah a ti.

 Asinain cozah pawl ziknawh einak vialte cu a rauhhlan ah a dong cang lai. Zeicah cutin kan chim khawh? Pathian nih zeidah a tuah lai timi kong he aa tlaiin Baibal chimmi kha i cinken.

 Baibal ah Pathian nih hitin a ti: “[Keimah Jehovah b nih, NW] dinnak kha ka duh i hremnak le thil ṭha lo tuahnak kha ka huat.” (Isaiah 61:8) Ziknawh a eimi hna ruangah mi pawl sifah harnak an tonmi kha Pathian nih a hngalh. (Phungthlukbia 14:31) Pathian nih hitin bia aa kam: “Retheimi cu aihram lengmang in an tuah hna caah, . . . ka ra lai i an ngaihmi himnak cu ka pek hna lai.”—Salm 12:5.

 Pathian nih zeidah a tuah lai? Pathian nih atu lio cozah hi thlen canah “Pathian Pennak” tiah auhmi vancung a cozah in a airolh lai. (Marka 1:14, 15; Matthai 6:10) Baibal nih hitin a ti: “Pathian nih pennak pakhat a ser lai i . . . hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.” (Daniel 2:44) Mah lam in Pathian nih atu ah kan hmuhmi ziknawh einak vialte hi a hrawh dih cang lai.

 Pathian Pennak cozah cu ziknawh a ei lai lo ti kha zeitindah kan hngalh khawh? A tanglei kong hna i ruathmanh.

1.  1. Ṭhawnnak. Mah Pennak nih a hmuhmi ṭhawnnak cu Lianngan Bik Pathian sinin a hmuhmi a si.—Biathlam 11:15.

    A biapitnak a ruang: Minung cozah cu an rammi pawl nih an pekmi hna tangka cungah hram aa bunh. Mah nih ziknawh einak le firnak hna a chuahter. Asinain Pathian Pennak tu cu Liangngan Bik nih a bawmh caah rammi nih an herhmi paoh kha a pek khawh hna lai.—Salm 145:16.

2.  2. Uktu. Pathian nih Jesuh Khrih kha Pennak Siangpahrang in rian a pek.—Daniel 7:13, 14.

    A biapitnak a ruang: Lungthin ṭha a ngeimi uktu pawl hmanh thil ṭha lo tuah awkah hnek an si kho. (Phungchimtu 7:20) Mah he aa ralkah in Jesuh nih ziknawh khawh a si lonak kong kha a langhter. (Matthai 4:8-11) Jesuh nih a rammi pawl kha a dawt tuk hna lai i an ca ṭhatnak lawng kha a tuahpiak hna lai.—Salm 72:12-14.

3.  3. Nawlbia. Pathian Pennak nawlbia cu a tlingmi a si i mah ningin a zulmi hna cu an i lawm.—Salm 19:7, 8.

    A biapitnak a ruang: Minung nawlbia cu a hnawk, thilrit a si i ṭhathnemhnak zong a um tuk lo. Mah nih ziknawh einak caanṭha a hmuhter. Asinain Pathian Pennak nawlbia cu zulh awkah a fawi i ṭhathnemhnak zong a um. (Isaiah 48:17, 18) Mah lengah mah nawlbia cu tuahsernak lawng si loin lungthin he zong aa pehtlaimi a si. (Matthai 22:37, 39) Pathian nih mi lungthin kha a hmuh khawh caah nawlbia a pek hna tikah zaangfahnak a ngei.—Jeremiah 17:10.

 Hmailei ah cozah pawl nih ziknawh an ei ti lai lonak kong he aa tlaiin Baibal biakam kong kha tam deuh in hlathlai awkah kan in sawm.

•   Pathian Pennak nih zeitikhmanh ah ziknawh a ei lai lonak a ruang pathum kong hngalh awkah “Pathian Pennak—Ziknawh A Ei Lomi Cozah Pakhat” timi [English] capar kha rel.

•   Pathian cozah kong le Pathian Pennak nih vawlei caah zeidah a tuah lai timi kong hngalh awkah Pathian Pennak Cu Zeidah A Si? timi video kha zoh.

•   Baibal biakam in ṭhathnemhnak hmuh khawh ning kong hngalh awkah man loin Baibal kha cawng chun.