2022, May 19 ah United Nations Security Council i a reng a sangmi nawlngeitu 75 leng sinin hitin theih a si, “COVID-19 pulrai le khuacaan thlennak ruangah vawlei pumpi ah eidin a har i Ukraine raldohnak nih a harter chinchin. Hmun cheukhat ahcun mangṭam hmanh a tlung.” Mah hnu tlawmpal ah “raldohnak nih buaibainak in a khatmi vawlei pumpi ah mi tampi kha mangṭam a tonter hna” tiah The Economist nih a thanh. Cu bantuk eidin harnak cu atu kan chan ah a um lai tiah Baibal nih a rak chimchung cang, asinain mah kha tawnghtham khawh awk zongah a kan bawmh.

•    Jesuh nih hitin a chimchung: “Ramkhat le ramkhat an i do lai, pengkhat le pengkhat an i tu lai. A kenkip ah mangṭam le lihnin a tlung lai.”—Matthai 24:7.

•    Biathlam Baibal cauk nih langhternak in rang aa citmi pali kong a chim. Rang aa citmi pakhat nih raltuknak kha a aiawh. A hnuah mangṭam a aiawhmi a dang pakhat nih a zulh, mah nih eidin a har lai i mi nih man fakpipi in an cawk lai caan kha a langhter. “Ka hun zoh i rangnak pakhat ka hmuh. A cung i aa citmi nih cun cuai thlainak pakhat aa put. . . . Aw pakhat ka theih i cu aw nih cun, ‘Nikhat ni hlawh caah changvut cu khiat khat, barli cu khiat thum.’ . . . a ti.”—Biathlam 6:5, 6.

 Eidin harnak he aa tlaimi Baibal chimchungbia hna cu Baibal nih “ni hmanung bik” tiah a auhmi atu kan chan ah a tling. (2 Timote 3:1) “Ni hmanung bik” caan kong le Biathlam i rang aa citmi pali kong kha tam deuh in hngalh awkah 1914 Thawkin Vawlei Cu Aa Thleng timi video kha zoh law “Rang Aa Citmi Pali—Ahote Dah An Si?” timi capar kha rel.

•    Baibal ah eidin man a kainak asiloah mangṭam hmanh i telin kan tonmi zuamcawhnak hna tawnghtham khawh awkah a kan bawmmi ruahnak cheuhnak hna aa tel. “Lahkhah Tlawmte In Khuasak Khawh Ning” timi capar i tahchunhnak cheukhat kha hlathlai.

•    Baibal nih thil sining hna cu an ṭha deuh te lai timi ruahchannak zong a kan pek. Mah cu ‘ram chungah rawl tampi in a um lai’ timi biakam a si i mikip nih ei awk tampi an ngei cang lai. (Salm 72:16) Hmailei kong he aa tlaimi Baibal ruahchannak kong le mah kha zeicah zumh khawh a si timi kong tam deuh in hngalh awkah “Hmailei Ruahchannak Taktak” timi capar kha rel.