“Inkhawhnak [nih] mi kha a remter hna.”—1995, UNESCO Declaration of Principles on Tolerance.

 Phundang in cun inkhawhnak kan ngeih lo ahcun midang kha upat hna loin kan um kho. Cuticun midang huatnak bia chim, duhdanhnak le zaangennak hmanh kan hun ngei kho.

 Asinain inkhawhnak kong he aa tlaiin mi pawl cu an ruahnak aa khat lo. Mi cheukhat nih inkhawhnak a ngeimi nih cun midang nih zei an tuah paoh ah a hna a tla lai i a bawmh hna lai tiah an ruah. Mi cheukhat tu cu Baibal nih a cohlanmi hmuhnak an ngei. Inkhawhnak a ngeimi hna nih midang phunglam le zumhnak kha an cohlan lo hmanh ah zalong tein thimnak nawl an ngeihmi kha an upat.

 Tuchan ah Baibal nih mi pawl kha inkhawhnak ngeih awkah a bawm kho taktak hna maw?

Inkhawhnak he aa tlaiin Biabal chimmi

 Baibal nih inkhawhnak ngeih ding in tha a kan pek. Hitin a ti: “Mi vialte sinah nemnak tein va um u. Bawipa cu tuan ah a ra lai.” (Filipi 4:5) Baibal nih midang kha zawnruahnak, a tlari te le ding tein pehtlaih awkah tha a kan pek. Mah ruahnak cheuhnak a zulmi hna nih midang ngeihmi ziaza asiloah phunglam hna kha cohlan in an tuah ve lo nain an i thimmi ning in an tuahmi kha an thloh hna lo.

 Asinain Pathian nih minung caah phunglam a serpiak hna. Hitin a ti: “Pathian nih cun thil ṭha kha zeidah a si ti cu an chimh cang ko ṭung hna.” (Mikah 6:8) Cutin lamhruainak a kan pekmi cu a ṭha bikmi nunnak kan ngeih khawh nakhnga caah a si.—Isaiah 48:17, 18.

 Pathian nih midang cung ah biaceihnak nawl a kan pe lo. Baibal nih hitin a ti: “Na minung hawi bia a ceihtu ding ah khan, aho ka si ti ah dah naa ruah?” (Jeim 4:12) Pathian nih kan dihlak in zalonnak a kan pek caah a phichuak zong kanmah nih kan in a hau.—Deuteronomi 30:19.

Upatnak kong he aa tlaiin Baibal chimmi

 Baibal nih “mi vialte kha upat hna u” tiah a kan ti. (1 Peter 2:17) Cucaah Baibal phunglam ning in nun awkah aa thimmi hna nih mi pawl i an zumhnak asiloah an nunning cu zei bantuk a si hmanh ah mikip kha upatnak he an pehtlaih hna. (Luka 6:31) Asinain mah cu mi nih an zumhmi paoh asiloah an hmuh ning paoh an hna a tla dih tinak a si lo. Mah can ah midang kha upatnak ngeih lo asiloah puar hrangpi in pehtlaih loin Jesuh nih midang a pehtlaih hna ning kha an si khawh chung in i zohchunh awkah an i zuam lai.

 Tahchunhnak ah, voikhat ah Jesuh cu amah a cohlang lo i an zumhnak zong aa khat lomi nu pakhat he an i tong. Mah nu cu a va a si lomi he an umṭi. Mah nu nunning le zumhnak cu Jesuh nih a hna a tla lo nain upatnak te he a chawnhbiak.—Johan 4:9, 17-24.

 Jesuh bantuk in Khrihfa pawl zong nih an zumhnak kong ngaih a duhmi hna kha ‘upatnak’ tein chimh awkah timhcia tein an um. (1 Peter 3:15) Baibal nih Khrihfa hna nih midang kha hnek hna lo awkah lamhruainak a kan pek. Cun zumhnak aa khat lomi hna i tel in Khrih zultu hna kha “aa si lengmangmi” si loin “mi vialte cung ah zaangfahnak a ngeimi” nan si awk a si tiah a ti.—2 Timote 2:24.

Huatnak kong he aa tlaiin Baibal chimmi

 Baibal nih “mi dang he rem i zuam u” tiah a kan ti. (Hebru 12:14) Midang he rem tein um aa zuammi hna nih huatnak kha an doh. Anmah phunglam kha ṭhumh loin mikip he rem tein um awkah an i zuam. (Matthai 5:9) Khrihfa pawl kha puarhrangpi in a pehtlaimi an ral pawl cung hmanh ah nem tein pehtlaih awk le dawtnak langhter awkah Baibal nih a forh hna.—Matthai 5:44.

 Baibal ah Pathian nih midang ning a zahtermi asiloah harnak a pe khomi tuahsernak hna kha ‘a huat’ asiloah ‘a fihnak’ kong kha a langhter. (Phungthlukbia 6:16-19) Asinain Baibal ah a ṭha lomi tuahsernak Pathian nih a duh lonak kong langhter awkah ‘huat’ timi biafang kha a hman. Baibal nih an nunning aa thleng i a phunglam ning in a nungmi hna kha Pathian nih lungtho tein a ngaihthiam hna i a bawmh hna tiah a ti.—Isaiah 55:7.

Inkhawhnak le upatnak he aa tlaimi Baibal caang hna

 Titas 3:2: “Pakhat le pakhat i rem [tlari, NWT] le i daw le lungnem cio tu in nan um lai.”

 Matthai 7:12: “Mi nih kan cung ah tuah hna seh ti nan duh bantuk khan midang cung zong ah va tuah ve u.”

 Joshua 24:15: “Nihin ni ah hin nan biak ding cu i thim u.”

 Lamkaltu 10:34: “Pathian nih mi vialte kha aa ruang tein a zoh hna.”

 Habakkuk 1:12, 13, NWT: “[Pathian nih] ṭhat lonak kha a ing kho lo.”

 Rom 12:19: “Pathian thinhunnak tu nih khan cucu tuah deuh ko seh. . . . ‘Phuhlam cu keimah rian a si, keimah nih ka lehrulh hna lai tiah Bawipa [Jehovah] nih a ti.’ ” a

 Jehovah Pathian nih aho hmanh phuhlamnak nawl a pe hna lo. Ri a khiahmi caan ah bia a ceih hna lai. Mah kong tam deuh in hngalh awkah “Dinnak A Um Nakhnga Thla An Cammi Kha Aho Nih Dah A Ngaihpiak Hna lai?” timi [Myanmar] capar kha rel.