Kum fatin vawleicung pumpi ah a ummi Jehovah Tehte Hna le an sawmmi mi nuai tampi cu Jesuh nih nawl a pek hna bantuk in Jesuh a thih Philhlonak ah an i pum hna. (Luka 22:19) Mah an i pumhmi nih Jesuh nih minung caah a nunnak a peknak a biapitnak a ruang kha hngalhthiam awkah a kan bawmh. Cun mah tlanhnak man nih atu le hmailei kan nunnak ah zeitindah ṭhathnemnak a kan pek timi kong zong hngalhthiam awkah a kan bawmh.—Johan 3:16.

 Tu kum Ruahnolhnak ah naa pumh zong, pumh lo zong ah Jesuh a thihnak in zeitindah ṭhathnemhnak na hmuh khawh? Jesuh nih kan tuah awk a simi a biapimi a kong pahnih kha a kan cawnpiak:

1.  1. Pathian le Jesuh kong kha hlathlai. A Pa sin thla a cam lioah Jesuh nih hitin a ti: “Cun Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.”—Johan 17:3.

2.  2. Na hlathlaimi ning in tuah. Jesuh nih a cawnpiakmi ning in kan nunnak ah zulh a herh ning kong kha a hleiin a langhter. Tahchunhnak ah, a min a thangmi Tlangcung Cawnpiaknak kha ‘a bia a ngai i a zulmi’ pawl thangṭhatnak bia in a donghter. (Luka 6:46-48) Cu bantuk in caan dang zong ah hitin a ti: “Atu cu hi biatak hi nan hngalh cang; nan tuah taktak ahcun zeitluk in dik nan i lawmh lai.”—Johan 13:17.

 Pathian le Jesuh kong kha tam deuh in hlathlai na duh maw? Na hlathlaimi ning in zeitindah ka zulh lai ti tah hngalh na duh maw? Aan bawm khomi a kong cheukhat kha hika ah langhter a si.

 Man loin Baibal i ruahceihṭinak nih mi tampi kha Baibal kong ṭha tein hlathlai awk le Baibal nih a chimmi ning in an nunnak ah zulh awkah a bawmh hna.

•   Mah program kong kha tam deuh in hngalh awkah Cawnpiaktu He Baibal Cawnnak Program timi cahmai ah zoh.

•   Jehovah Tehte Hna he Baibal cawnṭi cu zeidah a lawh ti hngalh awkah Baibal Cawn Dingin Kan In Sawm timi video kha zoh.

 Jehovah Tehte Hna cu Biakinn tiah hngalhmi pumhnak hmun ah zarhkhat ah voihnih kan i pum. Mah pumhnak ah Baibal kong le Baibal cawnpiaknak kan nunnak ah zeitindah kan hman khawh ning kong kha kan i ruah hna.

 Mah pumhnak ah mi kip i pumh khawh a si; Jehovah Tehte a si lomi hna zong i pumh khawh a si. Hmunhma sining he aa tlak in pumpak in asiloah videoconference call zong in i pumh khawh a si.

•   Mah pumhnak kong tam deuh in hngalh awkah Biakinn ah Zei Hna Dah An Tuah? timi video kha zoh.

•   Jehovah Tehte Hna i Khrihfabu Pumhnak timi cahmai ah nangmah he aa naih bikmi pumhnak kha kawl.

 Mah website ah taarmi capar le video tampi nih Jesuh cawnpiaknak kong le a thihnak in hmuhmi ṭhathnemhnak kong kha tam deuh in hngalh awkah aan bawmh khawh.

 Tahchunhnak ah, mi pakhat thihnak nih mi nuai tampi zeitindah a ṭhathnemh khawh hna timi kong hngalh awkah “Jesuh nih Zeitindah a Kan Khamh?” le ““Zeicah Jesuh Cu Fahnak In Buin A Thih?” asiloah Zeicah Jesuh A Thih? timi video kha zoh.