Ukraine raldohnak ah kan hmuh bantukin Khrihfa biaknaklei hruaitu tampi nih raltuknak kha lungtho tein an bawmh. Raldohnak ah a kaphnih ningin siangbawi nih an ṭanpi hna ning hi i cinken:

•   “Dotu hna sinin Ukraine huhphenh awkah ral a domi nan dihlak in upat thangṭhatnak kan in pek hna . . . Kan lungthin cu nan sinah a um, thla kan in campiak hna i a zungzal in kan in ṭanpi hna.”—Kyiv Khua i Metropolitan Epiphanius I, 2022, March 16, The Jerusalem Post report ningin.

•   “Russia Orthodox Church hruaitu bik nih Zarhpi Ni ah Russia ralkap pawl caah pumhnak a tuah i Moscow nih Ukraine ram kha a doh rih lai caah ‘Russia mi lawng nih kan tuah khawh’ timi lungduhnak taktak he ram kha huhphenh dingin thazaang a pek hna.”—Reuters, 2022, April 3.

 Khrihfa hna cu raltuknak ah an i tel awk a si maw? Baibal nih zeidah a chim?

 Jesuh Khrih hnu zultu taktak cu raltuknak ah an i tel lo ti kha Baibal nih a langhter.

•   “Na nam cu a kawng ah sawh ṭhan ko, zeicahtiah hriamnam a lami cu hriamnam in an thi lai.”—Matthai 26:52.

   Raltuknak tha a pemi asiloah raltuknak ah aa telmi pakhat nih Jesuh chimmi bia kha a zul taktak maw?

•   “‘Nawlbia thar kan pek hna, pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Pakhat le pakhat nan zawn nan i ruah ahcun mi vialte nih hi hna hi amah a zultu kha an si tiah an in hngalh hna lai’ tiah a ti hna.”—Johan 13:34, 35.

   Raltuknak tha a pemi pakhat nih Jesuh chimmi, a zultu an si le si lo a thleidantertu dawtnak phun kha a langhter maw?

 Tam deuh in hngalh awkah “Khrihfa Biaknak Cu Raltuknak He An I Pehtlai Maw?” [Myanmar] timi capar kha rel.

 Tuchan raldohnak ah i tel lo cu Khrihfa caah aa tlakmi a si maw? Aa tlak. “Hmailei caan [donghnak caan, NW]” tiah auhmi atu kan caan ah phunkip chungin mi hna cu Jesuh cawnpiaknak ningin “ral doh zong an i tim ti lai lo” tiah Baibal nih a chimchung.—Isaiah 2:2, 4.

•   Tam deuh in hngalh awkah “Pathian Nih Raldohnak Kha Zeitindah A Hmuh?” [Myanmar] timi Vennak Innsang capar kha rel.

 A rauhhlan ah “daihnak a kan petu Pathian” Jehovah a nih vancung a cozah hmangin mi pawl kha “hremnak chung le serhsatnak chungin” a khamh cang hna lai.—Filipi 4:9; Salm 72:14.

•   Cutin zeitindah a tuah lai ti hngalh awkah Pathian Pennak Cu Zeidah A Si? timi video kha zoh.