A Fakmi Lihnin Kong He Aa Tlaiin Baibal Nih Zeidah A Chimchung?
Kum fatin voi thong tampi li aa hnin. A tam deuh cu a fak tuk lomi lihnin an si nain a fakmi lihnin ruangah sunghralhnak, harnak le thihnak hna a chuak. Lihnin ruangah a chuakmi tsunami nih rili kam ah a ummi inn le lo tampi kha a hrawh i minung tampi an thi. Baibal nih cu bantuk a fakmi lihnin a tlung lai tiah a chimchung maw?
Hi capar ah
Lihnin kong kha Baibal nih a chimchung maw?
Baibal ah lihnin kong he aa tlaiin Jesuh nih a chimchungmi aa tel. Jesuh nih a chimmi bia kha Baibal cauk pathum ah hitin a langhter:
“Ramkhat le ramkhat an i do lai, pengkhat le pengkhat an i tu lai. A kenkip ah mangṭam le lihnin a tlung lai.”—Matthai 24:7.
“Ramkhat le ramkhat an i do lai, pengkhat le pengkhat an i tu lai. A kenkip ah lihnin a um lai i mangṭam a tlung lai.”—Marka 13:8.
“Hmun kip ah ṭih a nungmi lihnin le mangṭam le ngal-eu zawtnak a tlung lai.”—Luka 21:11.
Jesuh nih raltuknak, mangṭam le ngal-eu zawtnak hna an tlun lioah “a kenkip ah” “ṭih a nungmi lihnin” a tlung lai tiah a chimchung. Caankhatte ah mah thil vialte a canmi nih “chan donghnak” asiloah “ni hmanung bik” ah kan nung cang ti kha a langhter. (Matthai 24:3; 2 Timote 3:1) Baibal chanrelnak ningin “ni hmanung bik” cu 1914 in aa thawk i atu tiang a dong rih lo ti kha kan hngalh.
Tuchan i lihnin hna cu Baibal chimchungbia a tlinmi a si maw?
A si. Jesuh nih lihnin kong a chimchungmi cu atu kan chan i a cangmi thil sining he aa khat. 1914 thawk in a tha a fakmi lihnin voi 1,950 leng aa hninh ruangah mi nuaihnih leng an thi. a Mah kumzabu chungah aa hninmi lihnin cheukhat kong hi ruathmanh.
2004—India Rili. 9.1 tha a ṭhawngmi lihnin pakhat ruangah ram 12 tiang tsunami thlichia a hrang i minung 225,000 an thi.
2008—China. 7.9 tha a ṭhawngmi lihnin pakhat ruangah khuate le khuapi tampi a rawk i minung 90,000 an thi. Minung 375,000 hrawng hma an pu i mi nuai tampi cu inn le lo ngei loin an um.
2010—Haiti. 7.0 tha a ṭhawngmi lihnin aa hninh hnu le a dang lihnin ruangah minung 300,000 leng an thi i nuaikhat leng cu inn le lo ngei loin an um.
2011—Japan. 9.0 tha a ṭhawngmi lihnin le tsunami ruangah minung 18,500 hrawng an thi i nuai tampi cu inn le lo ngei loin an um. Fukushima meitha peknak zung a rawh caah nuclear khu tiang a rak zut. Kum hra a rauh hnu tiang mah meitha peknak zung pawngah a ummi minung 40,000 hrawng cu nuclear dah in a chuakmi ṭih a nungmi mei khu ruangah inn ah an ṭin ngam lo.
Lihnin kong he aa tlaiin Baibal chimchungbia cu kan caah zei sullam dah a ngeih?
Lihnin kong he aa tlaiin Baibal chimchungbia nih hmailei ah a cang dingmi kong kha a kan hngalhter. Jesuh nih hitin a ti: “Cu bantukin hi thil hna an hung um kha nan hmuh tikah Pathian Pennak cu a nai cang ti kha nan hngalh lai.”—Luka 21:31.
Baibal nih Pathian Pennak timi cu vancung in Jesuh nih a uk dingmi cozah a si tiah a ti. Mah Pennak caah thlacam dingin Jesuh nih a zultu pawl kha a cawnpiak hna.—Matthai 6:10.
Pathian Pennak nih vawlei a uk tikah lihnin i telin a dang leiser ral vialte zong Pathian nih a hrawh dih cang lai. (Isaiah 32:18) Mah lengah tuchan i lihnin hna ruangah kan tonmi pumsalei le lungthinlei fahnak vialte zong a damter dih cang lai. (Isaiah 65:17; Biathlam 21:3, 4) A konglam kha tam deuh in hngalh awkah “Pathian Pennak nih Zeidah A Liim Lai?” timi capar kha rel.
a Milu cazin hna cu United States National Geophysical Data Center nih vawleicung pumpi lihnin kong he aa tlaiin an khomhmi ca in lakmi a si.