Lilennak A Karh Chin—Baibal Nih Zeidah A Chim?
Nai i vawleicung pumpi report a ning in minung pali ah pakhat cu lileng in an um.
“Mah te lawng umnak nih zei bantuk kum le khoika hmun i a ummi an si hmanh ah ahopaoh a hnorsuan khawh hna.”—Chido Mpemba, cochair of the World Health Organization’s Commission on Social Connection.
Mi cheukhat nih kum upa asiloah anmah pakhat lawng a ummi hna cu lileng in an um tiah an ruah. Asinain mino, a dammi, a hlawh a tlingmi le innchunghawi a ngeimi hna zong lileng in an um kho. Mahte lawng umnak le lilennak nih pumsalei le lungthinlei ngandamnak kha a hnorsuan khawh.
U.S. i pum khuaihlaitu a simi Dr. Vivek Murthy nih hitin a ti: “Lilennak timi cu lung nuam loin um lawng kha a si lo. Midang he pehtlaihnak asiloah hawikomhnak tuah lo ruang ah a chuak khomi thihnak cu nikhat ah kuak fung 15 zuk ruang ah a chuak khomi thihnak he aa tluk.”
Baibal nih zeidah a chim?
A kan Sertu nih kanmah lawng in um hna seh ti a kan duh lo. Pathian tinhnak cu minung nih a ṭhami le lungsinak a ummi hawikomhnak ngei zungzal hna seh ti kha a si.
Baibal phunglam: “BAWIPA Pathian nih cun ‘Mipa amah lawng i a um hi a ṭha lo.’ . . . tiah a ti.”—Genesis 2:18.
Pathian nih amah he kan i pehtlaihnak kha ṭhanchoter hna seh ti a kan duh. Pathian nih amah naih awkah kan i zuam ahcun kaan naih ve hna lai tiah bia a kan kamh.—Jeim 4:8.
Baibal phunglam: “Pathian i bochan ka herh ti aa hngalmi cu lunglawmmi an si, vancung Pennak cu anmah ta a si lai.”—Matthai 5:3.
Pathian nih midang he amah kha ka biaṭi hna seh ti a kan duh. Cutin kan tuah tikah kan i nuam deuh.
Baibal phunglam: “Pakhat le pakhat kan i dawt khawh nakhnga le thil ṭha kan i tuahpiak khawh nakhnga, . . . Pakhat le pakhat hmunkhat i i pumh lengmang kha ngol hlah u sih.”—Hebru 10:24, 25.
Lilennak hrial cu zeicah a biapit tuk timi kong tam deuh in hngalh awkah “Pehtlaihnak A Ṭha Tukmi Vawlei Ah Lilennak” [Myanmar] timi capar ah zoh.
a The Global State of Social Connections, by Meta and Gallup, 2023.