Midang Na Bawmh Hnanak Thawng In Na Lilennak Kha Zorter—Baibal Nih Zeidah A Chim?
Vawleicung pumpi ah mi tampi cu umhar lilen in an um i midang he a ṭhami hawikomhnak zong an ngei lo. Midang kan bawmh hnanak nih lilennak a zorter khawh tiah ngandamnak kong hlathlaitu mifim cheukhat nih an zumh.
“A herhmi pawl bawmhnak nih kan nunnak kha sullam a ngeihter i kanmah lawng kan si timi ruahnak tei awk zong ah a kan bawmh.”—U.S. National Institutes of Health.
Midang bawmh awkah kan tuah khawhmi lamhruainak pawl kha Baibal ah hmuh khawh a si. Mah lamhruainak kan zulhmi nih lilennak tawnghtham khawh awkah a kan bawmh lai.
Na tuah khawhmi
Siannak langhter. A hleiin midang he caan hmanṭi khawh awkah caanṭha kawl. Na ngeihmi kha lungtho tein midang hrawm hna. Cutin na tuah ahcun an i lawm lai i hawikom ṭha nan si kho lai.
Baibal phunglam: “Midang thil pekṭhenh kha nan zia ah canter u law nanmah zong pekṭhenh nan si ve lai.”—Luka 6:38.
Midang bawmhnak ah na thazaang kha hmang. Harnak a tongmi hna bawmh khawh ning lam kha kawl. An cung ah zawnruahnak langhter law an chimmi bia kha ngaihpiak hna. Cutin an herhmi na tuahpiak hna ahcun an thilrit a zaang deuh lai.
Baibal phunglam: “Hawikom nih cun zei tik paoh ah dawt zungzal a si.”—Phungthlukbia 17:17.
Midang he a ṭhami pehtlaihnak ngeih khawh ning tam deuh in hngalh awkah “Chungkhar le Hawikom” timi [Myanmar] capar kha rel.