RALRING TEIN UM U!
Vawleicung Pumpi A Lautermi Meithal Kahnak—Baibal Nih Zeidah A Chim?
2022, July thla chung ah meithal kahnak ti bantuk zaangennak hna cu vawleicung pumpi ah a hung um:
“Meithal tlaihnak nawl an awnh lonak le zaangennak a tlawm biknak Japan ram ah a min a thangmi ramkhel lei rian a ṭuanmi [Prime Minister a rak simi Shinzo Abe] thah a si caah Japan rammi hna lawng si loin vawleicung pumpi i mi pawl zong therphang in an um.”—2022, July 10, The Japan Times.
“Copenhagen shopping mall ah pa pakhat nih minung pathum meithal in a kah hna caah Denmark rammi pawl cu an thin a phang tuk.”—2022, July 4, Reuters.
“Thlanglei Africa: Soweto khua i zu dawr pakhat ah phu pakhat nih mi pawl kha meithal in a kah hna i minung 15 an thi.”—July 10, 2022, The Guardian.
“US ah zung khar ni July 4 lawng ah meithal kahnak in minung 220 leng an thi.”—2022, July 5, CBS News.
Hi bantuk zaangennak hi a dongte lai tiah kan i ruahchan kho maw? Baibal nih zeidah a chim?
Zaangennak A Dong Lai
Baibal nih “ni hmanung bik” caan ah kan nung i mi pawl cu a puarhrangmi an si lai tiah a ti. (2 Timote 3:1, 3) Cu bantuk zaangennak ruang ah mi pawl cu ṭihnak in an khat. (Luka 21:11) Asinain Baibal nih zaangennak a dongh lai i “mi hna cu an inn ah khan daihnak le himnak a um lai” tiah bia a kan kamh. (Isaiah 32:18) Zaangennak cu zeitindah a dongh lai?
Pathian nih miṭhalo pawl kha a hrawh hna lai i hriamnam dihlak zong a hrawh lai.
“Miṭhalo hna cu ram chung khan hlonh an si lai.”—Phungthlukbia 2:22.
“[Pathian nih] hi vawlei cung pumpi ah ral cu a daihter dih ko hna, likuk cu a khiah hna i fei cu a hrawh dih hna phaw hna cu mei in a khangh dih hna.”—Salm 46:9.
Pathian nih mi pawl kha dai tein nun khawh ning lam a cawnpiak hna lai i cuticun zaangennak kha a donghter lai.
“ Zion Tlang, Pathian tlang thiang chungah cun thil ṭihnung le thil ṭhalo zeihmanh a um lai lo. Rili cu ti in a khah bantuk in hi ram cu Bawipa hngalhnak in a khat lai.”—Isaiah 11:9.
Pathian nih vawleicung pumpi i mi pawl kha zaangennak hrial awk le ‘an vainam hna cu tuhmui ah ser awk le an fei hna cu hlawhkawi ah ser’ awkah a cawnpiak hna.—Mikah 4:3.
Vawleicung ah ṭihnak a um ti lai lo timi Baibal biakam kong he aa tlaiin tam deuh in hngalh awkah “Zaangennak In Nangmah Le Nangmah I Kilveng” [Myanmar] timi capar kha rel.
Zaangennak zungzal in hloh a si lainak kong he aa tlaiin “Vawleicung Ah Daihnak A Um Cang Lai” [Myanmar] timi capar kha rel.