RALRING TEIN UM U!
Mi Nih Ramkhel Lei Rian A Ṭuanmi Hna Cung Ah Zumhnak An Ngei Ti Lo—Baibal Nih Zeidah A Chim?
2024 chung ah vawleicung pumpi ah thimfung zuhnak cu a hlan kum nakin a tam deuh lai. Asinain mi tampi cu ramkhel lei rian a ṭuanmi hna cung ah zumhnak an ngei ti lo.
American i hlathlainak pakhat nih mi zapi caah rianṭuan canah “ramkhel lei rian a ṭuanmi tam deuh nih mahca ṭhatnak ca tu ah ramkhel lei rian an ṭuanmi a si” tiah a ti. a—2023, September 19, Pew Research Center.
Mino tampi zong ramkhel lei rian a ṭuanmi hna cung ah zumhnak an ngei ti lo.
“Hlathlainak pakhat nih tuchan i kumhra fai pawl nih a biapimi kongkau tawnghtham ning lam kha biapi ah an chiah. Asinain ramkhel lei rian a ṭuanmi pawl nih cu bantuk tawnghtham ning kha an kawl lo tiah a ti.”—2024, January 29, The New York Times.
“Hlathlainak pakhat nih mino pawl nih ramkhel lei rian a ṭuanmi hna nakin YouTube ah thil a taarmi hna tu kha an zumh deuh hna tiah a ti.”—2024, January 22, The Korea Times.
A ṭha deuhmi hmailei caah ramkhel lei rian a ṭuanmi hna kha kan zum kho hna maw? Ahodah kan zumh khawh?
Na zumhmi minung kha i ralring
Mi nih an zumhmi hna kong he aa tlaiin hngalh duhnak an ngeihmi cu a ṭhami a si. Baibal nih “mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh” tiah a ti.—Phungthlukbia 14:15.
Kan theihmi thawngpang a hmaan le hmaan lo hngalh awkah “A Hmaan Lomi Thawngpang In Nangmah Le Nangmah I Kilveng” [Myanmar] timi capar kha rel.
Mah leng ah a dingfel i a lungput a ṭhami ramkhel lei rian a ṭuanmi hna hmanh nih an duhmi thil paoh an tuah kho lo. Cucaah Baibal nih hitin ralrin a kan pek:
“Bawi kha i bochan hna hlah u, nanmah an khamh kho ṭung hna lomi kha i bochan hna hlah u.”—Salm 146:3, Good News Translation.
Na zumh khawhmi hruaitu pakhat
Pathian nih thil a tuah kho bikmi le zumhawk a tlak bikmi mi pakhat kha rian a pek tiah Baibal nih a ti: Mah cu Jesuh Khrih a si. (Luka 1:32, 33) Jesuh cu vancung in uktu a ṭuan dingmi Pathian Pennak Siangpahrang a si.—Matthai 6:10.
Jesuh kha zeicah na zumh khawh timi kong le na tonmi buaibainak tawnghtham awkah zeidah a tuah lai timi kong kha hlathlai. “Pathian Pennak Siangpahrang Cu Ahodah A Si?” timi le “Pathian Pennak Nih Zeidah A Liim Lai?” timi capar kha rel.
a Pew Research Center, “Americans’ Dismal Views of the Nation’s Politics,” 2023, September.