RALRING TEIN UM PENG U!
Miphun Dihlak Aa Ruang Tein Pehtlaih Timi Cu A Si Kho Taktak Maw?—Baibal Nih Zeidah A Chim?
Mi tampi caah miphun aa ruang tein pehtlaih cu a tling kho lomi saduhthah men a si.
“Miphun thleidannak cu minung bu, phu le nifatin mi pawl nunnak cung ah harnak nganpi a chuahtermi siivai bantuk a si. Miphun thleidannak nih mi kha pakhat le pakhat a ding loin a pehtlaihter hna.”—António Guterres, UN Secretary-General.
Miphun aa ruang tein pehtlaihnak cu zeitik ah dah a si te lai? Baibal Nih Zeidah A Chim?
Miphun aa ruang tein pehtlaihnak he aa tlaiin Pathian hmuhnak
Baibal nih miphun aa lo lomi pawl Pathian nih zeitindah a hmuh hna ti kha a kan cawnpiak.
“[Pathian nih] minung pakhat chung in miphun vialte kha a ser hna i vawleicung ah hin khua a sakter hna.”—Lamkaltu 17:26.
“Pathian nih mi vialte kha aa ruang tein a zoh hna . . . Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan ko hna.”—Lamkaltu 10:34, 35.
Baibal nih mi vialte cu chungkhar pakhat kan si i Pathian nih zei miphun paoh a cohlan hna ti kha a langhter.
Miphun aa ruang tein pehtlaihnak an si te lai ning
Vancung cozah a simi Pathian Pennak tang ah miphun dihlak cu aa ruang tein pehtlaih an si cang lai. Mah cozah nih midang zeitindah ding tein pehtlaih awk a si ti kha a cawnpiak hna lai. Mi nih an rak ngeihmi miphun thleidannak hloh khawh ning kha an cawn lai.
“Vawlei le a cung i a ummi . . . [nih] dinnak hi zeidah a si ti kha an hngalh lai.”—Isaiah 26:9.
“Mi kip nih a dingmi thil kha an tuah cio caah daihnak le himnak zungzal in a um lai.”—Isaiah 32:17.
Tuchan i mi nuai tampi nih midang upatnak le hmaizahnak he zeitindah pehtlaih ding a si ti kha Baibal in an cawn.
Tam deuh in hngalh awkah I Hlau! mekazin, “Thleidannak A Tlauter Khotu A Um Maw?” timi capar kha rel.
Nulepa nih inn ah an fale he mah kong zeitindah an i ruah khawh timi kong hngalh awkah “Miphun Thleidannak He Aa Tlaiin Fale He I Ruahṭinak” timi capar kha rel.