Nu Pawl Himnak—Baibal Hmuh Ning
Vawleicung pumpi ah nu nuai tampi cu ningcang loin pehtlaih an si. Nang tah cutin pehtlaih na si ve maw? Pathian caah na himnak a biapitnak a ruang le nu pawl a ding loin pehtlaih an si ti lo nakhnga Pathian nih a tuah dingmi kong kha cawng.
“Ka ngakchiat lioin nifatin ka upa nih a ka velh i a ka volhpamh chih. Cun va ka ngeih hnu ah ka vapa a nu zong nih cutin a ka pehtlaih. Amah le ka vapa a pa zong nih an sal bantuk in an ka chawnhbiak. Keimah le keimah i thah ding hmanh in khua ka ruat.”—Madhu, a India.
Vawlei Pumpi Ngandamnak Phu nih “Nu pawl nih an tonmi zaangennak cu vawleicung pumpi ah a karh,” tiah a ti. Nu pathum ah pakhat nih an nunnak ah velhnak asiloah tlaihhremnak kha a tlawm bik voikhat an tong.
Cutin na ton bal ahcun ka kalnak kip ah volpamhnak, velhnak asiloah tlaihhremnak ti bantuk ṭih a nungmi thil ka tong kho i ka him lo tiah na ruah khawh men. Nu pawl nih an tonmi zaangennak le a ding loin pehtlaihnak ruang ah mi tam deuh nih ‘Nu pawl cu a biapimi an si lo’ timi ruahnak an ngei tiah na ti men lai. Pathian hmuhnak ah nu pawl cu man an ngei taktak maw?
Nu pawl himnak cu Pathian caah a biapi ti kha Baibal nih a langhter
Pathian nih nu pawl kha zeitindah a hmuh hna?
Baibal caang: “[Pathian nih] mipa le minu kha a ser hna.”—Genesis 1:27.
A sullam: Pathian nih pa pawl le nu pawl zong a ser hna. An pahnih in upat awk aa tlakmi in a hmuh hna. Mah leng ah vale nih a puarhrangmi biachimnak le zaangennak in an nupile kha uk an i zuam awk a si lo. Mah canah Baibal nih “vale nih nan nupile cu nan pum nan i dawt bantuk in nan dawt hna lai” tiah a ti. (Efesa 5:33; Kolose 3:19) Pathian caah nu pawl himnak a biapi timi cu a fiang ko.
“Ka ngakchiat tein ka chungkhat pawl nih ningcang loin an ka pehtlaih. Kum 17 ka si lioah ka rianbawi nih amah he nupa sualnak ka tuah lo ahcun rian kaan phuah lai tiah a ka ti. Ka upat hnu zong ah ka vapa, ka nu, ka pa le kan innpa hna nih a nauta deuhmi bantuk in an ka chawnhbiak. Asinain a kan Sertu Jehovah b kong kha ka cawn. Anih cu nu pawl kha a upat hna caah a ka dawt i a caah man ka ngei ti kha a ka zumhter.”—Maria, Argentina.
Lungthinlei damnak hmuh ṭhan awkah zeinihdah aan bawmh khawh?
Baibal caang: “Unau nakin a fek deuhmi hawikom zong an um.”—Phungthlukbia 18:24.
A sullam: Hawikom ṭha nih aan bawmh lai. A si khawh ahcun, na intuarnak kha naa bochanmi pakhatkhat sinah chim.
“Tlaihhrem ka si kha kum 20 chung ahohmanh ka rak chim bal hna lo. Cucaah kaa nuam lo, ka lungre a thei i ka lung zong a dong. Asinain ka bia ngaih a duhtu pakhatkhat sinah ka tonmi kong ka chimh tikah ka lung zong a zang deuh.”—Elif, Türkiye.
Baibal caang: “Amah nih an zohkhenh hna caah nan lungretheihnak vialte kha amah cung ah chia dih ko u.”—1 Peter 5:7.
A sullam: Thla na cam tikah Pathian nih na chimmi kha a ngaih taktak. (Salm 55:22; 65:2) Jehovah nih na zawn aan ruah caah zeitluk in dah aan sunsak timi hngalhthiam awkah aan bawmh khawh.
“Jehovah kong ka cawnmi nih ka lungfahnak dam ṭhan awkah a ka bawmh. Atu cu Pathian sinah thlacam in ka lungchung a ummi bia kha ka phuan khawh. Ka intuarnak a theihthiam taktakmi ka hawikom bantuk a si.”—Ana, Belize.
Pathian nih nu pawl a ding loin pehtlaihnak an tonmi kha a hlo te lai maw?
Baibal caang: “BAWIPA . . . hremmi hna le ngakṭah cu an aunak kha na theihpiak hna i anmah le ṭanh in bia na ceih, cucaah a thi khomi minung nih hin thil ṭihnung kha an umter ti lai lo.”—Salm 10:17, 18.
A sullam: A rauhhlan ah Pathian nih puarhrannak le nu pawl nih an tonmi zaangennak i tel in dinlonak vialte kha a hloh dih cang lai.
“A rauhhlan ah Jehovah nih nu le ngakchia nu pawl nih an tonmi a ding loin pehtlaihnak kha a hloh te lai ti ka cawnmi cu hma a damter khomi sii bantuk a si. Lungdaihnak a ka pek.”—Roberta, Mexico.
Baibal nih ruahchannak a pek ning kong tam deuh in hngalh awk, Baibal biakamnak kan zumh khawhnak a ruang le tuchan ah Baibal hmang in Jehovah Tehte Hna nih bawmhnak an pekmi kong tam deuh in hngalh awkah kha man loin na sinah rak len ṭhan ding in chim.
a An min cheukhat thlen an si.
b Jehovah timi cu Pathian pumpak min a si. (Salm 83:18) “Jehovah Cu Ahodah A Si?” timi capar kha zoh.