RALRING TEIN UM U!
Olympic Lentecelhnak Puai Hna Nih Mi Lung A Rualter Kho TakTak Maw?—Baibal Nih Zeidah A Chim?
2024, Ṭhalcaan ah tuahmi Olympic lentecelhnak puai ah ram 206 in a rami lente aa celhmi hna kha mi nuai thong nga hrawng nih an zoh hna lai. Ramkomh Olympic Kawmiṭi ah president a simi Thomas Bach nih hitin a ti: “Kannih cu vawleicung pumpi ah lungrual tein le dai tein mi a umter khomi puai ah aa telmi kan si. Cucaah pakhat le pakhat kan i thleidang nain mi vialte lungrual tein le dai tein um khawh awkah a kan bawmmi Olympic puai kha tuah hna u sih.”
Olympic puai nih mah hmuitinh kha a tlinter kho lai maw? Daihnak le lungrualnak taktak kan ngei kho lai maw?
Daihnak le lungrualnak i a hrampi cu zeidah a si?
Tu kum ah tuahmi Olympic puai cu lentecelhnak puai sawhsawh men a si lo tiah mi nih an ruah. Mah lentecelhnak hna nih mi lung a ṭhencheutermi zatlang nunning le ramkhel lei kong kha a hleiin an langhter. Mah ah minung zalonnak, miphun thleidannak, biaknak lei thleidannak le i ruanlonak hna aa tel.
Olympic puai ti bantuk ramkomh in tuahmi lentecelhnak hna nih mi lung kha an nuamhter. Asinain mah puai hna nih daihnak le lungrualnak taktak chuahter canah i ṭhencheunak lungput le tuahsernak tu kha an chuahter.
Mi nih ṭhencheunak a chuahtermi lungput an ngei te lai tiah Baibal nih a chimchung. (2 Timote 3:1-5) Mah kong he aa tlami Baibal chimchungbia tam deuh in hngalh khawh awkah “Baibal nih Tuchan Mi hna Ruahnak le Tuahsernak he aa tlaiin a Chimchung maw?” timi capar kha rel.
Vawleicung pumpi daihnak le lungrualnak he aa tlaimi ruahchannak taktak
Baibal ah vawleicung pumpi daihnak le lungrualnak caah ruahchannak taktak kong aa tel. Cun vancung cozah a simi “Pathian Pennak” tang ah a ummi hna cu lungrual tein an um lai ti zong in Baibal nih bia a kan kamh.—Luka 4:43; Matthai 6:10.
Pennak Siangpahrang a simi Jesuh Khrih nih vawleicung pumpi ah daihnak a chuahter lai. Baibal nih hitin a ti:
‘Dinnak le daihnak a karh lai.’—Salm 72:7, NWT.
“Amah a autu sifakmi hna le retheimi hna . . . kha a chanh hna. Hremnak chung le serhsatnak chung in a khamh hna.”—Salm 72:12, 14.
Tuchan hmanh ah Jesuh cawnpiaknak nih ram 239 ah a ummi mi nuai tampi kha an lung a rualter hna. Vawleicung pumpi ah a ummi Jehovah Tehte Hna nih daihnak a um nakhnga an cawn. Mah kong hngalh awkah “Huatnak Donghternak” timi Vennak Innsang capar kha rel.
Mah Kong Hna Zong Hi Na Duh Khawh Men
BAIBAL BIAHALNAK A PHI
Khoika In Dah Ruahchannak Kan Hmuh Khawh?
Zumhawk a tlakmi a hrampi nih atu ah na nunnak a ṭhatter khawh i hmailei ruahchannak zong aan pek khawh.
ESSENTIAL BIBLE TEACHINGS
Pathian Pennak Cu Zeidah A Si?
Jesuh nih vawleicung phung a chim lioah zeidang kong nakin Pathian Pennak kong kha a hleiin a rak cawnpiak hna. Kumzabu tampi chung Pennak a rat nakhnga mi tampi nih thla an rak cam.
KAN KONG
Rak Len Dingin Halnak
Baibal biahalnak kong kha i ruah u asiloah Jehovah Tehte Hna kong kha tam deuh in hlathlai.
