Tuchan ah vawleicung pumpi ah a hna a chetmi nuai 70 hrawng an um i pakhat le pakhat i pehtlaihnak caah kut holh phun 200 leng an hman. Ngaihchiat awk ngai a simi cu a tanglei ah langhter a si bantuk in hnachetmi hna cu a ding loin pehtlaih an si tawn:

•   “Vawleicung pumpi ah mi tampi nih hnachetmi pawl le khua ṭha tein a thei lomi pawl i an zalonnak kha zei ah an rel lo.”—National Association of the Deaf (U.S.).

•   “A ṭhangchomi ram ah a ummi hnachetmi pawl cu misifak hna lakah a si a fak bikmi an si. Fimnak cawn awk, rian hmuh awk le thawngpang theih awkah an i harh tuk.”—World Federation of the Deaf.

 Pathian nih hnachetmi hna kha zeitindah a hmuh hna? Hnachetmi hna kong he aa tlaiin Baibal nih zeidah a chim? Tuchan ah Jehovah Tehte Hna nih zeitindah an bawmh hna?

Hnachetmi Pawl Pathian Nih A Hmuh Hna Ning

 Jehovah a Pathian nih hnachetmi pawl an zawn a ruah hna ti kha Baibal ah a langhter. Ding tein pehtlaih hna sehlaw fim cawnnak a timhtuahmi in ṭhathnemhnak hmu hna seh ti a duh.

 Baibal caang: “Hnachet cu va vawlpam hlah.”—Levitikas 19:14.

 Baibal caang: “Pathian cu thleidannak a ngei lo.”—Lamkaltu 10:34.

 Baibal caang: “Jesuh cu khuapi he, khaute he a tlawng i . . . , Pennak kong thawngṭha kha a chimh hna.”—Matthai 9:35.

 Baibal caang: Jesuh nih “a hna a chetmi kha khua a theihter hna, a holh kho lomi zong a holhter hna.”—Marka 7:37.

 Baibal caang: “Hnachet nih khua an theih lai.”—Isaiah 35:5.

 A sullam: Jehovah nih hnachetmi pawl nih khua an theih lai tiah a chimchung.—Isaiah 29:18.

Tuchan Ah Jehovah Tehte Hna Nih Hnachetmi Pawl An Bawmh Hna Ning

 Jehovah Tehte Hna nih Pathian pekmi ruahchannak kong thawngṭha kha vawleicung pumpi ah a ummi hnachetmi hna sinah an chim. Mah rian liim khawh awkah zeidah kan tuah? Baibal le Baibal hlathlainak video hna kha kut holh 100 leng in kan chuah. Baibal cawn ding in kan sawm hna i kut holh in Khrihfabu pumhnak zong kan tuah. Pathian bawmhnak hmuh a duhmi poah kha man loin kan bawmh hna. Zeicah? “Man loin nan hmuh caah man loin va pe ve hna u” tiah Jesuh nih a ti caah a si.—Matthai 10:8.

 Mah ah langhtermi hna hi online ah na zoh khawh i na phone asiloah na tablet zong in download na tuah khawh:

 JW.ORG. Kut holh in tuahmi kha zoh awkah website cahmai i a cunglei poah ah a ummi holh thimnak zawn kha hmet.

 JW Library Sign Language app. Na phone asiloah na tablet ah mah app hi install na tuah ahcun kut holh in tuahmi video kha download na tuah khawh lai i na zoh khawh lai.

Zei Bantuk Baibal Cawnnak Hriamnam Dah Kan Ngeih?

 Kut holh Baibal. America kut holh in chuahmi Vawlei Thar Lehnak Baibal cu vawleicung pumpi ah a hmasa bik kut holh in uktling in lehmi Baibal a si. Atu ah Vawlei Thar Lehnak Baibal kha uktling asiloah a cheu in kut holh phun tampi in hmuh khawh a si cang. Cun kum fatin holh tam chinchin in chuah a si. (Lehmi holh phun cazin asiloah Baibal kha online in zoh awkah “ Kut Holh in Lehmi Vawlei Thar Lehnak Baibal” timi rinli kulh kha zoh.)

•   Kut holh in Baibal chuah awkah kan tuahmi kong hngalh awkah America Kut Holh ASL In Vawlei Thar Lehnak Baibal Uktling In A Ngah Cang timi [Myanmar] video kha zoh.

•   Baibal in ṭhathnemhnak tam deuh hmuh awkah JW Library Sign Language app kha install tuah. Mah app nih kut holh in lehmi na duhmi Baibal caang hna kha zoh khawh awkah aan bawmh lai.

•   Dmytro le Vita cu a hna a chetmi nulepa an si nain an fale cu an hna a chet lo. An chungkhar in kut holh in lehmi Baibal kha nifatin an zohṭinak thawng in zeitindah ṭhathnemhnak an hmuh ti kha zoh.

 Baibal kong a cawnpiakmi video pawl. A tanglei kong hna he aa tlaiin Baibal i zulhawktlakmi ruahnak cheuhnak kha mi nih an hngalhthiam nakhnga le an nunnak ah an hman khawh nakhnga bawmh awkah Jehovah Tehte hna nih kut holh in lehmi video hna an chuah . . .

•   Nuva le chungkhar

•   Kumhrafai le mino

•   Ngakchia

 Pumpak in tuahmi Baibal i ruahceihṭinak. Kut holh in Baibal cawn awkah pumpak Baibal aan cawnpiaktu kha bawmhnak hal law a caan zong na pek khawh zat in pe. Man loin Baibal cawnnak zeitindah tuah a si ti kha hmuhsak awkah hal hna.

 Jeson Senajonon cu Philippines ah a ummi a si. Baibal cawnnak nih Pathian he a ṭhami pehtlaihnak ngeih awkah zeitindah a bawmh ti kha zoh.

 Mario Antúnez cu Honduras ah church pastor a si. Baibal kong he aa tlaiin biahalnak a ngeihmi a phi zeitindah a hmuh ti kha hlathlai. A kong a chimmi “A Phi Nakin Biahalnak Ka Ngeihmi A Tam Deuh” timi [Myanmar] capar kha rel.

 Pumhnak le a biapimi caan hna. Vawleicung pumpi ah hnachetmi hna nih zarh fatin Pathian kong an cawn khawh nakhnga le an biak khawh nakhnga kut holh in tuahmi khrihfabu le phu hna kan ngei. Kum fatin Baibal kong cawn awkah kut holh in tuahmi civui zong kan ngei. Pumhnak le a biapimi caan hna ah a mit a caw i a hna a chetmi caah kut tawngh in holh kan lehpiak hna. Mitcaw caah tuahmi cauk zong man loin hmuh khawh a si.

•   Na umnak he aa naihmi Khrihfabu kha kawl.

•   Kum fatin tuahmi pengkomh civui le peng civui kong kha hlathlai.

•   Kumkhat chung ah a biapi bikmi pumhnak a simi Jesuh A Thih Philhlonak ah i pum.

 José Luis Ayala cu Mexico ah a ummi a si. A chuahka tein a hna a chet i a hnuah a mit zong a caw. Baibal hmual ngei tein cawnpiak a thiammi a si nakhnga zeitindah bawmh a rak si ti kha hlathlai.