Pul Rai Hlan I Kan Nunning Ah Kan Kir Kho Ṭhan Lai Maw? Pul Rai Hnuah Thlennawnnak Kha Tawnghtham Khawh Awkah Baibal Nih A Kan Bawmh Ning
“Kan dihlak in a hlan bantukin nun ṭhan kan duh.”—Angela Merkel, German chancellor.
Vawleicung pumpi ah COVID-19 pul rai a karh caah nang zong mah bantuk ruahnak na ngei ve ko lai. “A hlan bantuk” nunnak timi cu zeidah a si? Mi nih zeidah tuah an duh?
A hlan bantukin nun ṭhan an duh. Pakhat le pakhat i kuh, i chawnhbiak le khualtlawn a ngah lio nunning kha hmuh ṭhan an duh. Dr. Anthony Fauci a nih “a hlan bantukin nun ṭhan” timi cu “rawldawr ah ṭhut, baisakup zung hna kal ti bantuk” kha a chim duhmi a si tiah a ti.
Nunnak kha ṭhanchoter an duh. Mi cheukhat nih a hlan nakin a ṭha deuhmi “nunnak thar” thawk awkah caanṭha a si tiah an ruah. Lungretheihnak a tammi rian, mi pakhat le pakhat i namnehnak le lungthinlei damlonak hna hi a tlau lai tiah an ruah. Vawleicung Chawlehnak Forum a dirhtu Klaus Schwab nih “pul rai nih atu vawlei sining hi ruah ṭhan awk, remh ṭhan awk le thlen awkah caanṭha a hmuhter” tiah a ti.
Pul rai hnorsuannak ruangah “a hlan bantukin” nun ṭhan cu a si kho ti lai lo tiah a ruatmi zong an um. Tahchunhnak ah, mi tampi cu an rian an sung, an inn an sung i an ngandamnak a hnorsuan hna. A poi bikmi cu an dawtmi nih an thihtakmi hna kha a si.
Pul rai a dih hnuah nunnak cu zeitindah a si ṭhan lai ti kha ahohmanh nih an chim kho lo. (Phungchimtu 9:11) Asinain thil sining kha a hmaan ning tein hmuh thiam in zei thil paoh tawnghtham awkah Baibal nih a kan bawmh khawh. Cu lengah a fiangmi hmailei, kan ruah bal lomi hmailei nunnak phun a um lai Baibal nih tiah a ti.
COVID-19 pul rai he aa tlaiin a hmaanmi hmuhnak ngei
Vawlei “chan donghnak” ah “ngal-eu zawtnak” hi a tlung lai tiah Baibal nih a hlanpi in a rak chimchung cang. (Luka 21:11; Matthai 24:3) A um lai tiah Baibal nih a chimchungmi ah raldohnak, lihnin, mangṭam ti bantuk hmehchunhnak hna aa tel i mah ah COVID-19 pul rai zong aa tel ve.
Mah kong hngalhnak a ṭhatnak: Atu pul rai hi a ṭha deuh kho ko nain “harnak caan” ah kan nung tiah Baibal nih ralrin a kan pek. (2 Timote 3:1) Mah hngalhnak nih atu harnak caan ah a hmaanmi hmuhnak a kan ngeihter.
Baibal nih harnak in a khatmi kan vawlei cu a rauhhlan ah aa thleng cang lai timi a hmaanmi hmuhnak a kan ngeihter. Mah cu zei bantuk thlennak dah a si?
Pul rai a dih hnuah i ruahchan lomi hmailei
Atu ah kan tonmi harnak kong lawng si loin a ṭha deuhmi vawlei a nai cang timi kong zong Baibal nih a chimchung. Pathian lawng nih a kan tuahpiak khawh dingmi, minung cozah nih an tuah khawh lomi hmailei nunnak phun kha kan hmuh cang lai. “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—Biathlam 21:4.
Jehovah b Pathian nih “thil vialte kha a thar in ka ser dih cang hna” lai tiah bia aa kam. (Biathlam 21:5) Pul rai ruangah a chuakmi vawlei buaibainak hna kha Pathian nih a tawnghtham cang lai. Pathian nih mah hna hi a kan tuahpiak cang lai:
Lungthinlei le pumsalei ah a tlingmi ngandamnak kan hmu cang lai. Zawtnak le thihnak a um ti lai lo.—Isaiah 25:8; 33:24.
Lungretheihnak le thabatnak a um lomi, lungsi hnangamnak a pemi rian hna a um cang lai.—Isaiah 65:22, 23.
Sifah harnak le mangṭam a um ti lai lo i mi vialte nih ei awk, din awk tampi an ngei cang lai.—Salm 72:12, 13; 145:16.
Lungfahnak hna a lo dih cang lai, kan dawtmi a thimi hna an thawhṭhanmi kha kan hmuh lai.—Isaiah 65:17; Lamkaltu 24:15.
Mah kong hngalhnak a ṭhatnak: Baibal nih hitin a ti: “Hi ruahchannak hi kan nunnak caah a fekmi le a ṭhawngmi thircangai bantuk a si.” (Hebru 6:19) Mah a ṭha deuhmi thil hna kan i ruahchan caah fek tein kan um kho. Harnak hna inkhawh awk, lungretheih tuk lo awk, lungdai tein um awk le i nuamh awkah mah nih a kan bawmh.
Asinain Baibal biakam hna hi na zum kho taktak maw? “Baibal—Zumhawk a Tlakmi Biatak Hrampi” timi capar kha zoh.
Pul rai a dih hnu thlennak caan chungah zulh dingmi Baibal phunglam hna
Nunnak kha sunsak
Baibal: “Fimnak nih cun him tein a umter.”—Phungchimtu 7:12.
Aa pehtlaih ning: Zawtnak hrial khawh awkah fimhring tein biakhiahnak tuah. Na hmunhma thil sining kha hngalh i zuam. Ngandamnak le humhimnak ca lamhruainak, na hmunhma i zawtnak aa chawnmi milu le raikhamsii tling tein aa chun cangmi milu kha hngalh i zuam.
Ralring tein um peng
Baibal: “Mifim cu ralring tein a um i ṭhatlonak kha a hrial, sihmanhsehlaw mihrut cu aa ralring lo i khulrang tuk in a tuah tawn.”—Phungthlukbia 14:16.
Aa pehtlaih ning: Dam tein na um khawh nakhnga ralring tein um peng. Coronavirus cu caan saupi tiang a um rih lai tiah fimthiamnak a ngeimi hna nih an ruah.
Zumhawk a tlakmi thawngpang le a konglam lawng kha cohlang
Baibal: “Mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh.”—Phungthlukbia 14:15.
Aa pehtlaih ning: Ruahnak cheuhnak hna kha ṭha tein na hlathlai hnu lawngah zul. Thimnak na tuahmi cu a biapi tuk. Thawngpang hmaanlo kha na zumh ahcun mah nih na ngandamnak kha a hnorsuan khawh.
A ṭhatnaklei in hmuhnak ngei
Baibal: “Zeicahdah hlanlio ah khan atu nak hin thil kha a rak ṭhat deuh?” ti hlah, cucu fimnak biahalnak a si lo.”—Phungchimtu 7:10.
Aa pehtlaih ning: Atu lio thil sining he aa tlak in nun thiam awkah i zuam. Pul rai hlan i thil sining kong le pul rai he aa tlaimi lamhruainak le dingrep hna na zulh khawh lomi kong lawng ruah kha hrial.
Midang kha upat hna
Baibal: “Mi vialte kha upat hna.”—1 Peter 2:17.
Aa pehtlaih ning: Mi hna nih pul rai le pul rai ruang i a chuakmi harnak hna an tawnghtham ning cu aa lo cio lo. Midang hmuh ning kha upat law na biakhiahnak ningin zul. Raikhamsii aa chun lomi, kum upa pawl le zawtnak a ngeimi hna cungah zawnruahnak langhter.
Na lungsau
Baibal: “Dawtnak cu thlachiat a ruat i mi cungah zaangfahnak a ngei.”—1 Korin 13:4.
Aa pehtlaih ning: A hlanah hmaan tein an tuah tawnmi thil hna kan tuah kho ti lai lo tiah a chimmi hna cungah zawnruahnak langhter. Pul rai kong he aa tlaimi dingrep pawl an ṭhumh caah tuah naa timhmi thil na tuah tikah lungsaunak ngei.
Pul rai inkhawh awkah Baibal nih a kan bawmh ning
A ṭha tukmi hmailei kong Baibal biakamnak nih Jehovah Tehte Hna cu lungdaihnak a hmuhter hna. Pul rai cung lawngah lungthin pek lo awkah a bawmh hna. Cu lengah hmaan tein hmunkhat ah i pumh ding timi Baibal chimmi kha an zulh i pakhat le pakhat an i bawm. (Hebru 10:24, 25) Pul rai chung i video conference in an tuahmi Jehovah Tehte Hna pumhnak ah i pumh ve dingin mikip kha kan sawm hna.
Atu harnak caan ah Jehovah Tehte Hna he hmunkhat ah kan i pumhṭi caah ṭhatnak kan hmu tiah mi tampi nih an ruah. Tahchunhnak ah, COVID-19 zawtnak a ngeimi nu pakhat cu video conference in an tuahmi Jehovah Tehte Hna i pumhnak ah i pumh ve dingin sawm a si. Anih cu a dam lo nain mah pumhnak thawngin lungdaihnak a hmu. A hnuah hitin a ti: “Ka chungkhar bantukin ka ruah hna. Baibal ka rel tikah lungdaihnak ka hmu. Mah nih ka harnak cungah si loin hmailei ruahchannak cungah lungthin pek awkah a ka bawmh. Atu lawngah Pathian he i naih ka duhnak ka saduhthah a tlin caah kaa lawm tuk.”