RALRING TEIN UM U!
Raldohnak Le Khuacaan Thlennak Ruang Ah Vawleicung Pumpi Ah Tirawl Har Chinnak—Baibal Nih Zeidah A Chim?
Ukraine raldohnak le khuacaan thlennak ruang ah vawleicung pumpi ah tirawl chuahnak le kuatnak lei tiang in harnak a hung um. A hleiin a ṭhangchomi ram hna ah mi tampi nih tirawl a za in an hmuh nakhnga fakpi in an i zuam.
“Ramkhel lei buaibainak, khuacaan thlennak, mei man kainak le a dang thil hna ruang ah tirawl chuah awk le cawk awkah a hung har chin.”—António Guterres, UN secretary-general, 2023, July 17.
“Russia cu Ukraine in facang kuatnak hnatlaknak an tuahmi ah aa tel ti lo. Mah nih vawleicung pumpi ah tirawl a harter chin lai i tangka tlawmte lawng a lutmi ram hna, a hleiin Chaklei Africa le Nichuah Laifang ram hna ah tirawl man a kai chinchin lai tiah mifim pawl nih an ti.”—Atalayar.com, 2023, July 23.
Tirawl harnak le hmailei kong he aa tlaiin Baibal chimmi kha hlathlai.
Tirawl Harnak Kong He Aa Tlaiin Baibal Nih A Chimchung
Jesuh nih hitin a chimchung: “Ramkhat le ramkhat an i do lai, pengkhat le pengkhat an i tu lai. A kenkip ah mangṭam le lihnin a tlung lai.”—Matthai 24:7.
Biathlam Baibal ah rang aa citmi pali kong a langhter. Rang aa citmi pakhat nih raldohnak kha a aiawh. A hnu in a zulmi rang aa citmi nih tirawl rikhiah a si lainak caan le a man fakpi in cawk a si lainak caan mangṭam kha a aiawh. “Ka hun zoh i rangnak pakhat ka hmuh. A cung i aa citmi nih cun cuai thlainak pakhat aa put. . . . aw nih cun, ‘Nikhat ni hlawh caah changvut cu khiat khat, barli cu khiat thum . . . a ti.”—Biathlam 6:5, 6, Contemporary English Version.
Tirawl harnak kong he aa tlaiin mah Baibal chimchungbia cu Baibal nih “ni hmanung bik” tiah a auhmi atu kan caan ah a tling. (2 Timote 3:1) “Ni hmanung bik” kong le Biathlam ah a langhtermi rang aa citmi pali kong tam deuh in hngalh awkah 1914 Thawkin Vawlei Cu Aa Thleng timi video kha zoh law “Rang Aa Citmi Pali—Ahote Dah An Si?” timi capar kha rel.
Baibal Nih A Kan Bawmh Khawh Ning
Baibal ah tirawl man kainak le mangṭam kong i tel in a harmi thil sining tawnghtham khawh ning kong he aa tlaiin a ṭha tukmi ruahnak cheuhnak hna aa tel. Tahchunhnak cheukhat kha “Tangka Tlawm Tein Nun Khawh Ning” [Myanmar] timi capar ah zoh.
Baibal nih thil sining cu a ṭha deuh lai tiah ruahchannak a kan pek. “Ram chung ah rawl tampi” a um lai caan le mikip nih ei awk tampi an ngeih lai caan a phan lai tiah bia a kan kamh. (Salm 72:16) Mah hmailei ruahchannak kong le mah kha zeicah kan zumh khawh timi kong tam deuh in hngalh awkah “A Hmaanmi Hmailei Ruahchannak” [Myanmar] timi capar kha rel.