2022 chung ah vawleicung cozah pawl nih an ralkap caah (U.S.) dollar nuai, nuai 2.24 leng an hman. Cutin tangka tampi an hmannak a ruang cu a bik in Russia nih Ukraine a doh caah a si. Stockholm International Peace Research Institute (SIPRI) nih 2023, April thla i report a pekmi ning in, 2022 chung ah:

•   Europe ralkap nih an hmanmi tangka cu “kumkhat chung ah zatuak 13 tiang a kai. Mah cu raldohnak a daih caan chung ah Europe nih a hmanmi tangka a dihlak fonhmi nakin a tam deuh.”

•   “Russia…nih a hmanmi tangka cu zatuak ah 9.2 tiang a phan. Cucaah vawleicung ah tangka tam bik a hmangmi panganak in pathumnak ah a hung phan.”

•   United States nih “vawleicung pumpi i ralkap nih an hmanmi nakin zatuak ah 39 leng a hman caah” ralkap lei ah pakhatnak a si peng rih.”

 SIPRI report ṭialtu a si vemi Dr. Nan Tian nih “nai kum hna ah cozah nih an ralkap pawl caah an hmanmi tangka a tam chinchinmi nih a him lomi vawlei ah kan nung ti kha a langhter.”

 Baibal nih a ṭhawngmi cozah tam deuh cu pakhat le pakhat an i do lai i an kar ah buaibainak a um lai tiah a chimchung.

•   Kannih cu Baibal nih “donghnak caan” tiah a auhmi chung ah kan nung cang.—Daniel 8:19.

•   Daniel Baibal ah mah caan chung ah pakhat le pakhat aa zuammi vawlei nawlngeitu pawl cu an chuak lai tiah a chimchung. Mah vawlei nawlngeitu pawl cu nawl a ngei bikmi si awkah an i ‘tu’ asiloah an i zuam lai tiah a ti. Mah an i zuamnak ruang ah “ro vialte” asiloah an khonmi tangka kha tampi an hman lai.—Daniel 11:40, 42, 43.

 Lung cawlcangh awk ngai a simi Baibal chimchungbia kong tam deuh in hngalh awkah “A Tling Cangmi Chimchungbia—Daniel Dal 11 timi video kha zoh.

•   Baibal ah Pthian nih minung cozah kha a airolh lai tiah a ti. “Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”—Daniel 2:44.

•   Jehovah a Pathian nih minung nih an tuah khawh lomi zungzal in a hmunmi daihnak taktak kha a umter lai. Zeitindah? Vancung a Pennak nih raldohnak hriamnam le zaangennak vialte kha a donghter dih lai.—Salm 46:8, 9.

 Pathian Pennak nih a liim dingmi kong tam deuh in hngalh awkah “Pathian Pennak Ah Daihnak A Karh Lai” timi capar kha rel.