Biaknak Hna Cu Ramkhel Lei Ah An I Tel Awk A Si Maw?
Vawlei cungah Jesuh Khrih hnu zultu ka si aa timi mi tampi cu ramkhel lei ah an i tel. Mi cheukhat nih kuzale pawl le ramkhel lei party an bawmh hnanak thawngin an biaknak le ziazalei phunglam kha hlorh awkah an i zuam. Cun ramkhel lei a ṭuanmi hna zong nih church mi hna nih kan cohlang hna seh ti an duh caah social media le ziaza lei phunglam hna kha an hman tawn. Biaknak lei hruaitu hna nih ramkhel lei reng an hmuh nakhnga an i zuammi cu khuaruahhar awk a si lo. Cheukhat ram ahcun Khirhfa tiah aa timi hna kha peng asiloah miphun biaknak ti hmanh in ruah an si.
Zeitindah na ruah? Jesuh Khirh zultu pawl cu ramkhel lei ah an i tel awk a si maw? Jesuh nunning kong na hlathlainak thawngin a phi kha na hngalh khawh. Jesuh nih hitin a ti: “Nan caah i zohchunhawk kan tuahpiak cang hna, nan ca i ka tuah bantuk khan nannih zong nih nan tuah ve awk a si.” (Johan 13:15) Ramkhel lei kong he aa tlaiin Jesuh nih zei zohchunhawk dah a chiah?
Jesuh cu ramkhel lei ah aa tel maw?
Aa tel lo. Jesuh cu hi vawlei i ramkhel lei ah aa tel lo.
Jesuh cu ramkhel lei nawlngeihnak hmuh awkah aa zuam lo. Satan nih “vawleicung peng le ram vialte le an sunparnak vialte” kaan pek lai a ti tikah minung cozah uktu si ding kha a rak al. (Matthai 4:8-10) a Voikhat cu mi nih Jesuh cu hruaitu si awkah sining a tlinh ti kha an hmuh tikah ramkhel lei ah i tel dingin an rak hnek. Baibal nih hitin a ti: “Jesuh nih cun hramhram in siangpahrang i ser awkah hung hnuh an ka duh ti kha a hngalh caah tlang cungah khan amah lawngin a kal ṭhan.” (Johan 6:15) Mi nih tuahter an duhmi ningin Jesuh nih a rak tuah lo. Ramkhel lei ah i tel kha a rak al.
Jesuh cu ramkhel lei ah khoika lei hmanhah a ṭang lo. Tahchunhnak ah, Jesuh chan ah Judah mi hna nih Rom cozah sinah ngunkhuai an pekmi kha a ding lo tiin an hmuh i an pe duh lo. Mah kong he aa tlaiin Jesuh cu pakhatkhatlei ah ṭan dingin an hnek tikah ngunkhuai peknak le pek lonak kong he aa tlaiin ramkhel lei bia alnak ah aa tel lo. Hitin a ti hna: “Siangpahrang ta a simi cu Siangpahrang cu va pe ko u, Pathian ta a simi cu Pathian kha va pe ko u.” (Marka 12:13-17) Ramkhel lei ah khoika lei hmanhah a ṭang lo nain Jesuh nih Siangpahrang a aiawhmi Rom uktu bawi sinah ngunkhuai pek awk a si tiah a ti. Caankhat te ah nawlngeitu pawl an nawl kan ngaihmi hna cu ri a ngeimi a si ti zong kha a langhter. Mi pakhat nih pumpeknak le biaknak i telin Pathian lawng a pek awk a simi kha cozah sinah a pek hna awk a si lo.—Matthai 4:10; 22:37, 38.
Jesuh nih vancung cozah a simi Pathian Pennak kha a hlorh. (Luka 4:43) Minung cozah si loin Pathian Pennak lawng nih vawlei caah Pathian duhnak a tlinter khawh ti kha a hngalh caah ramkhel lei ah aa tel lo. (Matthai 6:10) Pathian Pennak nih minung cozah kha a hmang lai lo i a hrawh dih lai ti kha a hngalh.—Daniel 2:44.
Kumzabu pakhatnak i Khrihfa hna cu ramkhel lei ah an i tel maw?
An i tel lo. Jesuh zultu pawl nih ‘vawlei ta si hlah u’ timi Jesuh nawlpekmi kha an zulh. (Johan 15:19) Annih nih Jesuh nunning kha an i zohchunh i vawlei ramkhel lei ah i tel bal lo. (Johan 17:16; 18:36) Ramkhel lei kongkau ah i tel canah Jesuh nih nawl a pek hna bantukin Pathian Pennak kong kha an chim i an cawnpiak hna.—Matthai 28:18-20; Lamkaltu 10:42.
Kumzabu pakhatnak i Khrihfa hna nih an nunnak ah Pathian nawlngaih kha pakhatnak ah an chiah. Asinain vawlei nawlngeitu pawl cu upat awk an si ti zong kha an hngalh. (Lamkaltu 5:29; 1 Peter 2:13, 17) Nawlbia kha an zulh i ngunkhuai zong an pek. (Rom 13:1, 7) Ramkhel lei ah an i tel lo nain cozah nih an chuahmi upadi lei runvennak le rianṭuannak kha an cohlan.—Lamkaltu 25:10, 11; Filipi 1:7.
Tuchan ah Khrihfa hna cu khoika lei hmanhah an ṭang lo
Baibal nih Jesuh le hmasa i a zultu pawl cu ramkhel lei ah an i tel lo ti kha fiang tein a langhter. Cucaah vawleicung pumpi ah a ummi Jehovah Tehte Hna zong khoika lei hmanhah an ṭan lonak a si. Kumzabu pakhat i Khrihfa hna bantukin Jesuh nawlpekmi “Pennak kong tawngṭha” chimnak rian kha an ṭuan.—Matthai 24:14.
a Jesuh nih cutin a al lioah Satan cu cutin pek awkah nawlngeihnak na ngei lo tiah bia a al lo. A hnuah Satan kha “hi vawlei uktupa” tiah a auh.—Johan 14:30