RALRING TEIN UM U!
Ramkhel Lei Zaangennak—Baibal Nih Zeidah A Chim?
Ramkhel lei zaangennak tampi a um caah vawleicung pumpi ah a ummi mi pawl cu an thin a phang.
Mexico ah ramkhel lei kuzale 39 thah an simi i telin a dang ramkhel lei zaangennak hna ruang ah mi pawl cu an thin a phang i 2023-2024 thimfung i cuhnak kong he aa tlaiin an lung a vaivuan.
Nai ah Europe ah ramkhel lei kong he aa tlaiin zaangennak tampi a um. 2024, May 15 ah Slovakia vuanci thah a rak si.
2024, July 13 ah president hlun a simi Donald Trump thah an timhmi kong ruang ah United States rammi hna cu an lau tuk.
Ramkhel lei buaibainak cu zeicah mah tluk in a tam? Mah cu a dong te lai maw? Baibal nih zeidah a chim?
Ramkhel Lei Ṭhencheu A Si Lainak Kong Kha Baibal Nih A Chimchung
“Ni hmanung bik caan” a simi kan chan ah zaangennak le lung i khah lonak a chuahtermi mi tampi an um lai timi kong kha Baibal nih a chimchung.
“Ni hmanung bik caan cu a hleiin a harmi caan a si lai ti kha hngal u. Zeicahtiah mi cu . . . lawmh a hngal lomi, zumhawk a tlak lomi, . . . midang he hnatlaknak a ngei kho lomi, . . . a puarhrangmi, . . . mi rawi a hmangmi, a lung a khongmi, a ruam a kaimi . . . an si lai.”—2 Timote 3:1-4.
Baibal nih mah caan chung ah cozah ralchanhnak le ramkhel lei buaibainak a um lai ti zong in a chimchung. (Luka 21:9) Asinain ramkhel lei buaibainak le i ṭhen cheunak cu zungzal in a um lai lo.
Ramkhel lei buaibainak donghnak
Minung cozah hmun ah Pathian nih vancung ah a dirhmi a cozah in a airolh lai tiah Baibal nih a ti.
“Vancung Pathian nih pennak pakhat a ser lai . . . hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”—Daniel 2:44.
Pathian Pennak nih mi pawl kha an lung a rualter hna lai i vawleicung pumpi ah daihnak a umter lai.
Mah ah Uktu a simi Jesuh Khrih cu “Daihnak Bawi” tiah auh a si i ‘a ram kha zungzal in a daihter’ lai.—Isaiah 9:6, 7.
Atu hmanh in mah Pennak uktu a simi hna nih daihnak he um khawh ning kha an cawn. Mah a phichuak kong he aa tlaiin Baibal nih hitin a ti: “An vainam cu tuhmui ah an ser hna lai i an fei cu namtong ah an ser hna lai. Phunkhat le phunkhat an i do ti lai lo, ral doh zong an i tim ti lai lo.”—Isaiah 2:3, 4.
A kong tam deuh in hngalh awkah “Pathian Pennak nih zeidah a tuah lai?” [Myanmar[ timi capar kha rel law Pathian Pennak timi cu zeidah a si? timi video kha zoh.